పల్నాడు జిల్లాలో మిర్చి రైతుల ఆందోళన: రూ.1.5 కోట్ల బకాయిలు చెల్లించాలని డిమాండ్

పల్నాడు జిల్లా కారంపూడి మండలంలో మిర్చి రైతులు పురుగు మందు డబ్బాలతో ఆందోళన చేపట్టారు. మిర్చి వ్యాపారి అయ్యప్ప రూ.1.5 కోట్లు బకాయి చెల్లించాలని డిమాండ్ చేశారు.

గాదివారిపల్లి, బుట్టవారిపల్లి, కాచేవరం తదితర గ్రామాలకు చెందిన 50 మందికి పైగా రైతులు అయ్యప్పకు మిర్చి విక్రయించారు. డబ్బులు చెల్లించకుండా అయ్యప్ప పరారైనట్లు వారు ఆరోపించారు.

బకాయిలు తీర్చమని రైతులు అయ్యప్ప ఇంటికి వెళ్లగా, అతని భార్య పురుగు మందు తాగినట్లు నటించి డబ్బులు ఎగ్గొట్టే ప్రయత్నం చేసిందని రైతులు చెప్పారు.

రైతులు ఇప్పటికే పోలీసులకు ఫిర్యాదు చేసినా, అయ్యప్ప భార్య లాయర్ ద్వారా కౌంటర్ నోటీసు ఇప్పించడంతో అయ్యప్పను పోలీసులు విడిచిపెట్టారని వారు ఆరోపించారు. తమకు న్యాయం జరగాలని, డబ్బులు వసూలు చేసి ఇవ్వాలని రైతులు అధికారులను కోరారు.

దీంతో న్యాయం జరగకపోతే పురుగు మందు తాగాల్సి వస్తుందని రైతులు హెచ్చరించారు.