పల్నాడు జిల్లాలో ప్రియుడి అనుమానంతో యువతి హత్య

పల్నాడు జిల్లా కారంపూడి మండలంలోని చింతపల్లి సమీపంలో కాలువ పక్కన ఈరోజు ఉదయం దారుణం జరిగింది. ప్రియుడు అనుమానంతో యువతిని కత్తితో పొడిచి హత్య చేశాడు.

పోలీసులు తెలిపిన వివరాల ప్రకారం, నిందితుడు జిలుగు బాల సైదులు ఇనపరాజుపల్లి గ్రామానికి చెందినవాడు. మృతురాలు షేక్ హసీనా చిరుకులూరుపేటకు చెందినది. వీరిద్దరూ గుంటూరు సమీపంలోని తిలపతి ఇంజనీరింగ్ కళాశాలలో బీటెక్ చదువుతున్న విద్యార్థులు.

వీరి మధ్య కొంతకాలంగా ప్రేమ వ్యవహారం ఉన్నట్లు పోలీసులు గుర్తించారు. సైదులు తన ప్రియురాలిపై అనుమానం పెంచుకున్నాడు. ఈ రోజు ఆమెను మాట్లాడాలని చింతపల్లి కాలువ దగ్గరికి పిలిచాడు. అక్కడ వారి మధ్య వాగ్వాదం జరిగింది. ఈ క్రమంలో సైదులు కత్తితో దాడి చేసి హత్య చేశాడు.

సమాచారం అందుకున్న పోలీసులు సంఘటనా స్థలానికి చేరుకుని నిందితుడిని అదుపులోకి తీసుకుని విచారిస్తున్నారు.