పాపికొండల బోటింగ్‌ తాత్కాలికంగా నిలిపివేత

పాపికొండల పర్యాటక బోటింగ్‌ను తాత్కాలికంగా నిలిపివేయాలని అధికారులు నిర్ణయించారు. ఈ నిర్ణయంతో ఒక ఏపీ టూరిజం బోటు, 15 ప్రైవేట్ బోట్ల ఆపరేషన్లు నిలిచిపోయాయి.

సాధారణంగా ఈ బోట్లు పోలవరం జిల్లా దేవిపట్నం మండలంలోని గండిపోషం ఆలయం నుంచి బయలుదేరుతాయి. శుక్రవారం శ్రీలక్ష్మి అనే బోటు ప్రయాణికులతో వెళ్తూ నది మధ్యలో సాంకేతిక లోపంతో నిలిచిపోయింది. ప్రయాణికులు ఆందోళన చెందగా, అధికారులు మరో బోటు పంపి వారిని గమ్యస్థానానికి చేర్చారు.

బోట్ల నిర్వహణ, భద్రతపై ఆరోపణలు రావడంతో ప్రభుత్వం అన్ని పర్యాటక బోట్లపై ప్రత్యేక భద్రత తనిఖీలు చేపట్టాలని ఆదేశించింది. తనిఖీలు పూర్తయ్యి, బోట్లు సురక్షితంగా ఉన్నట్లు ధృవీకరణ పత్రాలు జారీ చేసిన తర్వాతే బోటింగ్‌ను తిరిగి అనుమతించాలని అధికారులు నిర్ణయించారు.