పరకాలలో BRS వర్గ విభేదాలు: క్రికెట్ టూర్నమెంట్ ఫ్లెక్సీలు చించిన కార్యకర్తలు

వరంగల్ జిల్లా పరకాలలో BRS వర్గ విభేదాలు బయటపడ్డాయి. క్రికెట్ టూర్నమెంట్ కోసం టౌన్‌లో పోచంపల్లి ఫౌండేషన్ ఏర్పాటు చేసిన ఫ్లెక్సీలను కొందరు BRS కార్యకర్తలు చించేశారు.

ఆ ఫ్లెక్సీలపై KCR, KTR ఫోటోలు లేవని కార్యకర్తలు చెప్పారు. స్థానిక ఎమ్మెల్యే ఫోటో కూడా పెట్టలేదని వారి ఆరోపణ. అందుకే ఆ ఫ్లెక్సీలను తీసేశామని వారు చెప్తున్నారు. రాత్రిపూట ఆ ఫ్లెక్సీలను పూర్తిగా తొలగించారు. ఈ క్రీడా పోటీలకు MLC పోచంపల్లి శ్రీనివాస్ రెడ్డి ఫౌండేషన్ ద్వారా స్పాన్సర్ ఇచ్చారు. ఆయనను గెస్ట్‌గా కూడా ఆహ్వానించారు.

మరోవైపు ఈ తొలగింపును పోచంపల్లి శ్రీనివాస్ రెడ్డి అనుచరులు తప్పు పడుతున్నారు. దీపావళి సందర్భంగా జరిగే క్రీడా పోటీలను పార్టీకి ఎందుకు ఆపాదిస్తున్నారని వారు ప్రశ్నిస్తున్నారు. క్రికెట్‌కు పార్టీకి సంబంధం ఏంటని క్రీడాకారులూ అడుగుతున్నారు. KCR, KTR, స్థానిక నేత ఫోటోలు ఉంచి ఉంటే తాము స్వాగతించేవాళ్లమని స్థానిక కౌన్సిలర్లు చెప్పారు.

పరకాల నియోజకవర్గంలో మాజీ ఎమ్మెల్యే ధర్మారెడ్డి, MLC పోచంపల్లి శ్రీనివాస్ రెడ్డి మధ్య కొంతకాలంగా ఆధిపత్య పోరు నడుస్తోంది. ఈ పోరులో భాగంగానే ఫ్లెక్సీల వివాదం తెరపైకి వచ్చిందని స్థానిక నేతలు చర్చించుకుంటున్నారు. పరకాల గ్రౌండ్‌లో క్రీడా పోటీల ఎంపిక ప్రక్రియ కొనసాగుతోంది.