పార్లమెంట్ వర్షాకాల సమావేశాలు నేటి నుండి ప్రారంభం; డీలిమిటేషన్, మహిళా రిజర్వేషన్ బిల్లులపై చర్చ

పార్లమెంట్ వర్షాకాల సమావేశాలు సోమవారం ప్రారంభమయ్యాయి. ఈ సమావేశాలు ఆగస్టు 13 వరకు 19 రోజుల పాటు కొనసాగుతాయి.

ఈ సెషన్‌లో కేంద్ర ప్రభుత్వం డీలిమిటేషన్ (నియోజకవర్గాల పునర్విభజన) బిల్లు, మహిళా రిజర్వేషన్ (నారీ శక్తి వందన అధినియం) అమలుకు అవసరమైన చట్టపరమైన ప్రక్రియతో సహా మొత్తం 8 బిల్లులను ప్రవేశపెట్టే అవకాశం ఉంది. జనాభా ప్రాతిపదికన లోక్‌సభ, అసెంబ్లీ స్థానాలను సవరించే డీలిమిటేషన్ బిల్లు గత సెషన్‌లో ఇండియా కూటమి అడ్డుకుంది.

తొలి రోజు ఉదయం 11 గంటలకు సభ ప్రారంభమై, మొదటి గంట ప్రశ్నోత్తరాలకు కేటాయించారు. చమురు రంగ ప్రభుత్వ సంస్థల న్యాయ వివాదాలపై కేంద్ర సహాయక మంత్రి సురేష్ గోపి ప్రకటన చేయనున్నారు. లాభదాయక పదవుల సంయుక్త కమిటీ తీర్మానాన్ని ఎంపీలు ఈటెల రాజేంద్ర, అభయ భట్ ప్రవేశపెడతారు. సుప్రీం కోర్టు జడ్జిల సంఖ్య పెంచే తీర్మానాన్ని న్యాయశాఖ మంత్రి అర్జున్ రామ్ మేఘ్వాల్ ప్రవేశపెట్టనున్నారు.

ప్రతిపక్ష ఇండియా కూటమి అయోధ్య రామ మందిర విరాళాల వివాదం, నీట్ పేపర్ లీక్, నిత్యవసర వస్తువుల ధరల పెరుగుదల, అంతర్జాతీయ చమురు ధరల ప్రభావం వంటి అంశాలపై ప్రభుత్వాన్ని ప్రశ్నించనుంది. ఎన్డిఏ రాబోయే ఎన్నికల కోసం ‘మిషన్ 360’ ప్రణాళిక సిద్ధం చేస్తున్నట్లు సమాచారం ఉంది. ఇటీవల టీఎంసీ, శివసేన, పంజాబ్ నుంచి కొందరు ఎంపీలు ఎన్డిఏలో చేరడంతో అధికార పక్షం బలం కొంత పెరిగింది. అయినప్పటికీ కీలక బిల్లుల ఆమోదానికి మరో 30 మంది సభ్యుల మద్దతు అవసరం.

భద్రత కోసం ఢిల్లీలోని సెంట్రల్ ఢిల్లీ, పార్లమెంట్ పరిసరాల్లో అదనపు బలగాలు మోహరించారు.