పార్లమెంటరీ కమిటీ కీలక సిఫారసు: బేబీ ఫుడ్‌లో చక్కెర శాతం నియంత్రించాలి

పార్లమెంటరీ కమిటీ పార్లమెంటుకు సమర్పించిన నివేదికలో పసిపిల్లల ఆహార ఉత్పత్తుల్లో చక్కెర శాతాన్ని నియంత్రించాలని కేంద్ర ప్రభుత్వానికి సిఫారసు చేసింది. బేబీ ఫుడ్ తయారీ కంపెనీలపై వార్షిక తనిఖీలు పెంచాలని, చక్కెర స్థాయిలను ఎరుపు, పసుపు, ఆకుపచ్చ రంగులతో ప్యాకెట్లపై తప్పనిసరిగా సూచించాలని సూచించింది. ఈ నివేదిక జూలై 23న సమర్పించారు.

చక్కెర వల్ల పిల్లల్లో ఊబకాయం, మధుమేహం, దంత సమస్యలు వంటి వ్యాధులు పెరుగుతున్నాయని వైద్య నిపుణులు హెచ్చరిస్తున్నారు. భారతదేశంలో 41 మిలియన్ పిల్లలు అధిక బరువుతో ఉన్నారని నివేదికలు చెబుతున్నాయి. ఐసీఎంఆర్ మార్గదర్శకాలు జారీ చేయగా, ఢిల్లీ ప్రభుత్వం హై షుగర్, హై సాల్ట్ ఫుడ్స్పై టాక్స్ విధించాలని సూచించింది.

మరోవైపు అంతర్జాతీయ ఆహార దిగ్గజం నెస్లే సంపన్న దేశాల్లో బేబీ ఫుడ్‌లో చక్కెర కలపడం లేదని, కానీ భారత్ వంటి అల్ప ఆదాయ దేశాల్లో కలుపుతోందని స్విస్ పరిశోధన సంస్థ పబ్లిక్ ఐ, ఐబీఎఫ్ఏఎన్ సంయుక్తంగా జరిపిన దర్యాప్తులో వెల్లడైంది. ఈ విషయంలో కేంద్రం ప్రత్యేక దృష్టి సారించాలని కమిటీ కోరింది.

ఎఫ్ఎస్ఎస్ఏఐ ప్రమాణాల ప్రకారం ప్యాకేజింగ్, లేబులింగ్ నిబంధనలను ఖరారు చేసి అమలు చేయాలని పార్లమెంటరీ కమిటీ స్పష్టం చేసింది. రెండేళ్ల క్రితం ముసాయిదా నిబంధనలు నోటిఫై అయినా అమలు కాలేదని, వెంటనే చర్యలు తీసుకోవాలని కోరింది.

వైద్య నిపుణులు తల్లిదండ్రులకు సూచనలు చేస్తూ, రెండేళ్ల లోపు పిల్లలకు చక్కెర ఉన్న ఆహారం పూర్తిగా నివారించాలన్నారు. బదులుగా నీళ్లు, పాలు, అరటిపండ్లు, పీచ్‌పండ్లు ఇవ్వాలని చెప్పారు. చిన్నతనంలో చక్కెర రుచి అలవాటు చేస్తే జీవితాంతం తీపి పదార్థాలపై మక్కువ పెరిగి ఆరోగ్య సమస్యలు వచ్చే ప్రమాదం ఉంటుందని హెచ్చరించారు.