పఠాంచేరు ఆటో డ్రైవర్ శేఖర్ హత్య కేసు: నిందితుల అరెస్టు

సంగారెడ్డి జిల్లా పఠాంచేరులో ఆటో డ్రైవర్ శేఖర్ హత్య కేసును పోలీసులు 24 గంటల్లోపు చేదించారు. నిందితుడు బైండ్ల నవీన్, మృతుడి భార్య ప్రమీళను పోలీసులు అరెస్టు చేశారు.

మృతుడు శేఖర్ వికారాబాద్ జిల్లాకు చెందిన వ్యక్తి. కొంతకాలంగా ఇస్నాపూర్‌లో నివసిస్తున్నాడు. నాలుగేళ్ల క్రితం హోటల్ నడిపే నవీన్‌తో శేఖర్‌కు పరిచయం ఏర్పడింది. నవీన్ శేఖర్ ఇంటికి తరచూ వచ్చి వెళ్తుండేవాడు. ఈ క్రమంలో శేఖర్ భార్య ప్రమీళతో నవీన్‌కు వివాహేతర సంబంధం ఏర్పడింది.

ప్రమీళ ఏడు నెలల గర్భవతిగా ఉన్న విషయం తెలుసుకున్న శేఖర్, నవీన్‌ను హెచ్చరించాడు. దీంతో నవీన్ శేఖర్‌ను తొలగించుకోవాలని నిర్ణయించాడు. ఈ నెల 12న శేఖర్‌ను హతమార్చాడు. తర్వాత మృతదేహాన్ని పఠాంచేరు ORR సర్వీస్ రోడ్డు పక్కన ఒక ఖాళీ స్థలంలో వదిలి, దానిపై గోతాలు కప్పేశాడు.

ఈ నెల 14న ఉదయం సమాచారం అందుకున్న పఠాంచేరు పోలీసులు ఘటనా స్థలానికి చేరుకుని మృతదేహాన్ని గుర్తించారు. మృతుడు ఇస్నాపూర్‌లో ఆటో డ్రైవర్‌గా పని చేసే రాయిగళ్ల శేఖర్ అని నిర్ధారించారు. అనంతరం నిందితులను అరెస్టు చేశారు. హత్యలో ఉపయోగించిన స్కూటీ, రెండు మొబైల్ ఫోన్లను స్వాధీనం చేసుకున్నారు.