15 ఏళ్ల సర్వీస్: హిందూ కాలేజీ లెక్చరర్‌కు నోటీసు లేకుండా ఉద్యోగం నుంచి తొలగింపు

ఆంధ్రప్రదేశ్‌లోని ఒక హిందూ కాలేజీలో 15 ఏళ్లుగా ఫిజిక్స్ లెక్చరర్‌గా పనిచేస్తున్న ఎస్. పావని, తనను ఎలాంటి నోటీసు లేకుండా ఉద్యోగం నుంచి తొలగించారని ఫిర్యాదు చేశారు. జూన్ 15న కాలేజీకి వెళ్లగా తన పేరు లిస్ట్‌లో లేదని, ప్రిన్సిపాల్, వైస్ ప్రిన్సిపాల్ ద్వారా సెక్రటరీ చెరువు రామకృష్ణమూర్తిని సంప్రదించగా తనకు పని లేదని, వెళ్లిపొమ్మని చెప్పారని ఆమె వెల్లడించారు.

పని లేదనే కారణంతో తనను తొలగించి కొత్త సిబ్బందిని నియమించారని, అలాగే నలుగురిని ఇదే విధంగా తీసేశారని పావని పేర్కొన్నారు. స్పందనలో ఫిర్యాదు చేయగా, కలెక్టర్ ఆదేశాలతో ఆర్డీవో విచారణకు రావాల్సి ఉండగా, సరైన విచారణ జరపకుండానే తన ఫిర్యాదు కొట్టివేసినట్లు, తాను సమయం వృధా చేస్తున్నానంటూ లేఖ ఇచ్చారని ఆమె ఆరోపించారు.

తనకు అపాయింట్మెంట్ ఆర్డర్, 15 ఏళ్ల పీఎఫ్ కట్టింగ్, పర్మనెంట్ హోదా కోసం వెరిఫికేషన్ జరిగినా నోటీసు లేకుండా తొలగించడం చట్టవిరుద్ధమని పావని వాదిస్తున్నారు. మహిళా ఎమ్మెల్సీకి ఫిర్యాదు చేయగా, సెక్రటరీ నోటీసు ఇస్తామని చెప్పినా ఒక నెలగా ఎలాంటి చర్య లేదని, న్యాయం కోసం కోర్టును ఆశ్రయించాలని ఆలోచిస్తున్నానని ఆమె తెలిపారు.

ఈ విషయంపై కాలేజీ యాజమాన్యం స్పందన తెలియాల్సి ఉంది.