పవన్ కల్యాణ్ కేంద్ర మంత్రి భూపేందర్ యాదవ్‌తో భేటీ; AP ప్రతిపాదనలకు సానుకూల స్పందన

డిప్యూటీ సీఎం పవన్ కళ్యాణ్ ఢిల్లీలో కేంద్ర పర్యావరణ, అటవీ శాఖ మంత్రి భూపేంద్ర యాదవ్‌తో సమావేశమయ్యారు.

ఈ భేటీలో ఆంధ్రప్రదేశ్ ప్రభుత్వం తరఫున పలు కీలక ప్రతిపాదనలు చేశారు. కేంద్ర ప్రాయోజిత పథకాలకు అదనపు ఆర్థిక సహాయం, సముద్ర తీర రక్షణ గోడల నిర్మాణం, గోదావరి నదిలో కాలుష్య నివారణ చర్యలు, రాష్ట్రంలో పచ్చదనం పెంపు (ఏపీ గ్రీనింగ్ సొసైటీ, గ్రేట్ గ్రీన్ వాల్) వంటి అంశాలను ఆయన ప్రస్తావించారు.

పులుల జనాభాలో జన్యు వైవిధ్యం లోపించకుండా నిరోధించేందుకు మధ్యప్రదేశ్, మహారాష్ట్రల నుండి ఆరు పులులను, ఏపీలో గోశాలల అవసరాలకు మధ్యప్రదేశ్ నుండి 50 ఆవులను కేటాయించాలని పవన్ కళ్యాణ్ అభ్యర్థించారు. కేంద్ర మంత్రి వెంటనే మధ్యప్రదేశ్ సీఎం మోహన్ యాదవ్, మహారాష్ట్ర సీఎం దేవేంద్ర ఫడ్నవీస్‌లతో ఫోన్‌లో మాట్లాడి, ఈ అభ్యర్థనలను వారికి తెలియజేశారు.

ఇద్దరు ముఖ్యమంత్రులు ఆవులు, పులులను పంపేందుకు అంగీకరించారు. మధ్యప్రదేశ్ నుండి 50 ఆవులను సెప్టెంబర్ 5 నుంచి అక్టోబర్ లోపు పంపేందుకు సమ్మతించారని, మహారాష్ట్ర 4 పులులను, మధ్యప్రదేశ్ 2 పులులను పంపనున్నట్టు పవన్ కళ్యాణ్ వివరించారు.

పవన్ కళ్యాణ్ కేంద్ర మంత్రి, ఇతర ముఖ్యమంత్రులకు ధన్యవాదాలు తెలిపారు. ఏపీలో పచ్చదనం పెంచడంతోపాటు పులుల సంరక్షణకు కేంద్రం నుండి మద్దతు లభించిందని, ఈ చర్యలు రాష్ట్రానికి ఎంతో ప్రయోజనం చేకూరుస్తాయని ఆయన పేర్కొన్నారు.