జంతర్ మంతర్ వద్ద ప్రధాని మోదీపై విమర్శలు తనను బాధపెట్టాయి: పవన్ కల్యాణ్

ప్రధాని నరేంద్ర మోదీపై ఇటీవల జంతర్ మంతర్ వద్ద జరిగిన విమర్శలు తనను తీవ్రంగా కలచివేశాయని జనసేన అధినేత, ఏపీ డిప్యూటీ సీఎం పవన్ కల్యాణ్ చెప్పారు. శుక్రవారం భోగాపురం ఎయిర్పోర్ట్ వేదికగా జరిగిన కార్యక్రమంలో ఆయన ఈ వ్యాఖ్యలు చేశారు.

పవన్ కల్యాణ్ మాట్లాడుతూ, జంతర్ మంతర్ వద్ద మోదీని విమర్శించిన వారి మాటలు విని తన కళ్లలో నీరు వచ్చాయన్నారు. దేశం కోసం శ్రమిస్తున్న వ్యక్తిని ఇలా దూషించడం సరికాదని అభిప్రాయపడ్డారు.

ప్రధాని మోదీ ఒక్క రోజు కూడా సెలవు తీసుకోకుండా దేశ అభివృద్ధి కోసం పని చేస్తున్నారని ఆయన కొనియాడారు. భారత్‌పై ఈర్ష్య చెందుతున్న విదేశీ శత్రువులతో పాటు అంతర్గత వ్యతిరేక శక్తులతో కూడా మోదీ పోరాడాల్సి వస్తోందని పేర్కొన్నారు. దేశంలో మోదీని ఎదుర్కోగల నాయకుడు ఎవరూ లేరని, ప్రజలు ఆయనకు అండగా ఉండాలని పిలుపునిచ్చారు.

పిల్లల తల్లిదండ్రులకు సూచన చేస్తూ, సరైన సంస్కారాలు నేర్పించాల్సిన అవసరం ఉందన్నారు. మోదీ తనను దూషించిన వారిని సైతం మనస్ఫూర్తిగా క్షమించారని, ఆ మహోన్నత వ్యక్తికి తాను పాదాభివందనం చేస్తున్నానని పవన్ కల్యాణ్ తెలిపారు.