గోదావరి కాలుష్యంపై పవన్ కళ్యాణ్ అకస్మాత్ తనిఖీ — రాజమహేంద్రవరంలో సమీక్ష

ఉపముఖ్యమంత్రి పవన్ కళ్యాణ్ తూర్పు గోదావరి జిల్లాలో రెండో రోజు పర్యటన కొనసాగించారు. గోదావరి నదిలో కలుస్తున్న కాలుష్య జలాలను స్వయంగా పరిశీలించేందుకు ఉదయమే బోట్లో ప్రయాణించారు.

రాజమహేంద్రవరం సమీపంలోని వెంకటనగరంలో ఆంధ్ర పేపర్ మిల్లు వ్యర్థాలు శుద్ధి చేయకుండా నేరుగా గోదావరి నదిలో కలుపుతున్నట్టు గుర్తించారు. ఈ విషయంపై పవన్ కళ్యాణ్ అసంతృప్తి వ్యక్తం చేశారు. Pollution Control Board (PCB) అధికారులకు, మున్సిపల్ అధికారులకు హెచ్చరికలు జారీ చేశారు.

నల్లా చెరువు దగ్గర ఉన్న మురుగునీటి శుద్ధి కేంద్రాన్ని కూడా అకస్మాత్తుగా తనిఖీ చేశారు. తర్వాత రాజమహేంద్రవరం మున్సిపల్ కార్పొరేషన్‌లో ఉన్నతాధికారులతో సమీక్ష సమావేశం నిర్వహించారు. కలెక్టర్ కీర్తి చేకూరి, మున్సిపల్ కమిషనర్ రాహుల్ మీనా, PCB అధికారులు, Clean Krishna Godavari Mission అధికారులు ఈ సమావేశంలో పాల్గొన్నారు.

ప్రస్తుతం గోదావరి తీరంలో 50 MLD సామర్థ్యం ఉన్న ఒక మురుగునీటి శుద్ధి కేంద్రం పని చేస్తోంది. మరో 50 MLD కేంద్రం నిర్మాణ దశలో ఉంది. దాని నిర్మాణంలో జాప్యంపై పవన్ కళ్యాణ్ అధికారులను ప్రశ్నించారు.

కేంద్ర జలశక్తి శాఖ నుండి ₹86 కోట్లు మురుగునీటి శుద్ధి కేంద్రాల ఏర్పాటుకు కేటాయించడానికి సిద్ధంగా ఉన్నట్టు పవన్ కళ్యాణ్ తెలిపారు. అదనంగా PCB కి కాలుష్య నివారణ కోసం ₹100 కోట్లు ఇచ్చేందుకు సిద్ధంగా ఉన్నట్టు ప్రకటించారు. వచ్చే ఆరు నెలల్లోపు అన్ని చోట్ల శుద్ధి కేంద్రాలు ఏర్పాటు చేయాలని ఆదేశించారు.

రాబోయే గోదావరి పుష్కరాలకు నాటికి నది కాలుష్యరహితంగా ఉండేలా చర్యలు తీసుకోవాలని, ఇందుకోసం ప్రత్యేక task force ఏర్పాటు చేయాలని పవన్ కళ్యాణ్ ఆదేశాలు జారీ చేశారు.