గోదావరి పుష్కరాల ఏర్పాట్లపై డిప్యూటీ సీఎం పవన్ కళ్యాణ్ అసంతృప్తి

డిప్యూటీ సీఎం పవన్ కళ్యాణ్ గోదావరి పుష్కరాల ఏర్పాట్లను పరిశీలించేందుకు రాజమహేంద్రవరం వెళ్ళారు. పనుల్లో వేగం లేదని, స్పష్టమైన ప్రణాళిక లేదని అధికారులపై అసంతృప్తి వ్యక్తం చేశారు.

2027 జూన్‌లో జరగనున్న గోదావరి పుష్కరాలకు సుమారు ఒక సంవత్సరం మాత్రమే సమయం మిగిలి ఉంది. ₹8,600 కోట్ల విలువైన 7,369 పనులకు ఇంకా DPR (Detailed Project Report) సిద్ధం కాలేదని పవన్ కళ్యాణ్ పేర్కొన్నారు. చివరి నిమిషంలో హడావిడిగా పనులు చేస్తే నిర్మాణాలు కూలిపోయే ప్రమాదం ఉందని హెచ్చరించారు.

పుష్కరాలు రాజమహేంద్రవరానికే పరిమితం చేయకూడదని పవన్ కళ్యాణ్ స్పష్టం చేశారు. ఆరు జిల్లాల్లోని 274 పంచాయతీల్లో ఘాట్ ఏర్పాట్లు చేయాలని అధికారులకు ఆదేశించారు. Tourism శాఖ ఇంకా సన్నద్ధంగా లేదని ఆందోళన వ్యక్తం చేశారు.

గోదావరిలో కాలుష్యం నివారణపై కూడా పవన్ దృష్టి పెట్టారు. పేపర్ మిల్స్ వ్యర్థ జలాలకు ప్రత్యామ్నాయ ఏర్పాట్లు చేయాలని, కాలుష్య ఆడిట్ చేపడతామని తెలిపారు. కాలుష్య రహిత గోదావరిలో పుష్కరాలు నిర్వహించడమే లక్ష్యమని పేర్కొన్నారు. ఈ అంశాలన్నింటిపై cabinet లో చర్చిస్తామని చెప్పారు.

పవన్ కళ్యాణ్ రాజమహేంద్రవరం పుష్కర ఘాటు నుంచి కోటిలింగాల ఘాటు వరకు బోటులో ప్రయాణించి పనుల పురోగతిని సమీక్షించారు. తర్వాత విజేశ్వరం వెళ్ళి మంత్రి కందుల దుర్గేష్ ప్రతిపాదించిన రోడ్డు మార్గాన్ని పరిశీలించారు. ఈ పర్యటనలో మంత్రి కందుల దుర్గేష్, ఎమ్మెల్యేలు బుచ్చయ్య చౌదరి, ఆదిరెడ్డి వాసు, ఎమ్మెల్సీ సోము వీర్రాజు పాల్గొన్నారు.