నేడు మంగళగిరిలో జనసేన పార్టీ నిర్మాణ కమిటీలతో పవన్ కళ్యాణ్ సమావేశం

జనసేన పార్టీ అధ్యక్షుడు, ఉపముఖ్యమంత్రి పవన్ కళ్యాణ్ నేడు మంగళగిరిలోని సికే కన్వెన్షన్‌లో పార్టీ నిర్మాణ సమాచార సేకరణ కమిటీలతో సమావేశం కానున్నారు.

రెండు రోజుల క్రితం 25 పార్లమెంట్ నియోజకవర్గాలకు ఈ కమిటీలను ప్రకటించిన విషయం తెలిసిందే. ప్రతి నియోజకవర్గానికి అధ్యక్షుడు, సహాయక సభ్యులతో కూడిన ఈ కమిటీలో గ్రామ స్థాయి నుంచి రాష్ట్ర స్థాయి వరకు వివిధ శ్రేణుల నేతలు, మెంబర్‌షిప్ నమోదు ఎక్కువగా చేసిన కార్యకర్తలు ఉంటారు.

ఈ కమిటీల విధి, యాజమాన్య విధానాలు, రాబోయే స్థానిక సంస్థల ఎన్నికల్లో అభ్యర్థుల ఎంపిక, పార్టీలో అంతర్గత సమస్యల పరిష్కారం కోసం సమన్వయ కమిటీ ఏర్పాటు వంటి అంశాలపై పవన్ కళ్యాణ్ దిశా నిర్దేశం చేయనున్నట్టు పార్టీ వర్గాలు తెలిపాయి.

ఇప్పటికే పార్టీ సుమారు 25 లక్షల మంది సభ్యత్వ నమోదు పూర్తి చేసింది. కొత్తగా పార్టీలో చేరికల కోసం 13 మంది సభ్యులతో ప్రత్యేక కమిటీ కూడా ఏర్పాటైంది. ఈ నేపథ్యంలో పార్టీని భవిష్యత్తులో ఎలా ముందుకు తీసుకెళ్లాలనే దానిపై ఈ సమావేశం కీలకంగా భావిస్తున్నారు.