వెన్ను నొప్పితో క్యాబినెట్ భేటీ నుంచి డిప్యూటీ సీఎం పవన్ కళ్యాణ్ నిష్క్రమణ

ఏపీ డిప్యూటీ సీఎం పవన్ కళ్యాణ్ క్యాబినెట్ సమావేశంలో పాల్గొంటూ వెన్ను నొప్పి తీవ్రమవడంతో మధ్యలోనే నిష్క్రమించారు. ఆయన మంగళగిరిలోని తన పార్టీ కార్యాలయానికి వెళ్లి విశ్రాంతి తీసుకుంటున్నారు.

గత నెలలో ఆయన సైనస్ సంబంధిత సమస్యకు శస్త్రచికిత్స చేయించుకున్నారు. డాక్టర్లు నెల రోజులు విశ్రాంతి తీసుకోవాలని సూచించారు. ప్రధాని మోదీ, సీఎం చంద్రబాబు నాయుడు అప్పుడు ఆయన ఇంటికి వెళ్లి ఆరోగ్యం గురించి అడిగారు.

పూర్తిగా కోలుకోకపోయినా, పవన్ కళ్యాణ్ పుష్కరాల ఏర్పాట్లు, నీటి నాణ్యత పరీక్షలు వంటి కార్యక్రమాల్లో పాల్గొన్నారు. ఇటీవల తెలంగాణ ఆవిర్భావ దినోత్సవం సందర్భంగా హైదరాబాద్ వెళ్లి ప్రెస్ మీట్ పెట్టి మాట్లాడారు. ఈ కార్యకలాపాలతో ఆయనకు అలసట పెరిగిందని పార్టీ వర్గాలు చెప్పాయి.

నేటి క్యాబినెట్‌లో కీలక నిర్ణయాలు ఉన్నందున విధులకు హాజరయ్యారు. కానీ సమావేశం మొదలైన కొద్దిసేపటికే వెన్ను నొప్పి తీవ్రమైంది. బయటకు వచ్చిన తర్వాత డాక్టర్‌కు ఫోన్ చేసి, సూచించిన మందులు తీసుకుని రెస్ట్ తీసుకుంటున్నారు. సీఎం చంద్రబాబు నాయుడు కూడా ఆయనకు విశ్రాంతి తీసుకోమని సలహా ఇచ్చారు.

ప్రస్తుతం పవన్ కళ్యాణ్ పూర్తి విశ్రాంతిలో ఉన్నారు. ఆయన ఆరోగ్యంపై అధికారిక ప్రకటన ఇంకా వెలువడలేదు.