పిఠాపురంలో రూ.200 కోట్లతో రోడ్ల నిర్మాణం: పవన్ కార్యాలయం వివరాలు

ఉప ముఖ్యమంత్రి పవన్ కళ్యాణ్ కార్యాలయం పిఠాపురం నియోజకవర్గంలో రోడ్ల నిర్మాణానికి సంబంధించిన వివరాలు వెల్లడించింది. రూ.200 కోట్లకు పైగా వ్యయంతో 307 కిలోమీటర్ల మేర కొత్త రోడ్ల నిర్మాణం చేపడుతున్నట్లు తెలిపింది. ఇప్పటికే 611 రోడ్ల నిర్మాణం పూర్తయింది. వీటి విలువ రూ.100 కోట్లకు పైగా ఉంది. 152 కిలోమీటర్ల రోడ్లు నిర్మించామని, మరో 70కి పైగా రోడ్ల పనులు కొనసాగుతున్నాయని కార్యాలయం పేర్కొంది. లక్ష్యంలో 80% పనులు పూర్తయ్యాయి.

ఉప్పాడ తీర ప్రాంతంలో జెట్టి రోడ్డు నిర్మించారు. మాయాపట్నం కాలనీలో రూ.1.52 కోట్లతో CC రోడ్డు, 2.88 కిలోమీటర్ల డ్రైనేజీ పనులు చేపట్టారు. కొత్త సూరాడపేట కాలనీలో రూ.93 లక్షలతో 1.6 కిలోమీటర్ల సిమెంట్ రోడ్లు వేశారు.

యూ కొత్తపల్లి మండలంలో తుఫాన్లు, వర్షాలకు దెబ్బతిన్న రోడ్లను రూ.88 లక్షలతో పునర్నిర్మించినట్లు వివరించారు. ముమ్మడివారిపాడు గ్రామానికి రూ.79.70 లక్షలతో శాశ్వత రహదారి సౌకర్యం కల్పించారు. పిఠాపురం-ఉప్పాడ R&B రోడ్డు నిర్లక్ష్యానికి గురై 8,000 మంది ఇబ్బంది పడ్డారని, ఆ రోడ్డును రూ.1.22 కోట్లతో యుద్ధ ప్రాతిపదికన పూర్తి చేసినట్లు కార్యాలయం తెలిపింది.

బిబిజి రామ్జీ నిధులతో 'పల్లె పండుగ 2.0' కింద రైతులు పంటల రవాణాకు వీలుగా పొలాల మధ్య డొంక రోడ్ల నిర్మాణం చేపట్టినట్లు కార్యాలయం వివరించింది.