జల్ జీవన్ మిషన్ పనులపై డిప్యూటీ సీఎం పవన్ కళ్యాణ్ సమీక్ష

డిప్యూటీ సీఎం పవన్ కళ్యాణ్ ఉమ్మడి తూర్పు, పశ్చిమ గోదావరి జిల్లాల తీర ప్రాంతాల్లో తాగునీటి సమస్య పరిష్కారానికి చేపట్టిన అమరజీవి జలధార ప్రాజెక్ట్ పురోగతిపై సమీక్ష నిర్వహించారు. ఈ ప్రాజెక్టును వేగవంతంగా పూర్తి చేయాలని అధికారులను ఆదేశించారు.

జల్ జీవన్ మిషన్ కింద రూ.3,050 కోట్ల వ్యయంతో ఈ మెగా వాటర్ గ్రిడ్ ప్రాజెక్టును చేపట్టారు. దీని లక్ష్యం సుమారు 33 లక్షల మందికి స్వచ్ఛమైన తాగునీరు అందించడం. పవన్ కళ్యాణ్ మాట్లాడుతూ, ప్రాజెక్ట్ పూర్తయితే తీర ప్రాంత గ్రామాల్లో నీటి ఎద్దడి తీవ్రత తగ్గుతుందని అన్నారు.

ఇంటేక్ వెల్స్, వాటర్ ట్రీట్మెంట్ ప్లాంట్లు, రిజర్వాయర్లు, పైప్‌లైన్ల నిర్మాణం వంటి కీలక పనులను నిర్ణీత గడువులోపు పూర్తి చేయాలని ఆదేశించారు. పెండింగ్ అనుమతులను వివిధ శాఖల సమన్వయంతో త్వరితగతిన పూర్తి చేయాలని సూచించారు. నాణ్యత విషయంలో రాజీ పడవద్దని అధికారులకు సూచించారు.

త్వరలో రాష్ట్రవ్యాప్తంగా జల్ జీవన్ మిషన్ పనులను స్వయంగా క్షేత్రస్థాయిలో పరిశీలించి, నాణ్యత తనిఖీలు నిర్వహిస్తానని పవన్ కళ్యాణ్ వెల్లడించారు.