ప్రపంచ పర్యావరణ దినోత్సవం: 2.5 కోట్ల సీడ్ బాల్స్ తయారీలో ఉపముఖ్యమంత్రి పవన్ కల్యాణ్ పాల్గొన్నారు

ప్రపంచ పర్యావరణ దినోత్సవం సందర్భంగా, ఆంధ్రప్రదేశ్ ఉపముఖ్యమంత్రి పవన్ కల్యాణ్ 2.5 కోట్ల సీడ్ బాల్స్ తయారీ కార్యక్రమంలో పాల్గొన్నారు. ఈ కార్యక్రమాన్ని రాష్ట్ర అటవీ శాఖ నిర్వహించింది.

రాష్ట్రవ్యాప్తంగా 250కు పైగా లొకేషన్లలో ఈ కార్యక్రమం వర్చువల్ విధానంలో జరిగింది. వివిధ జిల్లాల ప్రజలు ఉపముఖ్యమంత్రితో కలిసి సీడ్ బాల్స్ తయారు చేశారు. ఇది ప్రపంచ రికార్డు లక్ష్యంగా చేపట్టినట్టు నిర్వాహకులు తెలిపారు. గతంలో 2.1 కోట్ల సీడ్ బాల్స్ తయారు చేసిన రికార్డు ఉంది. ఈసారి 2.5 కోట్ల సీడ్ బాల్స్‌తో కొత్త రికార్డు సృష్టించాలనే లక్ష్యంతో ఈ కార్యక్రమం నిర్వహించారు.

ఈ సందర్భంగా పవన్ కల్యాణ్ మాట్లాడుతూ, ప్రతి ఒక్కరూ స్వచ్ఛమైన గాలి, నీటి సంరక్షణ, సహజ వనరుల పొదుపు వంటి పర్యావరణ అనుకూల అలవాట్లు పాటించాలని చెప్పారు. హరిత ఆంధ్రప్రదేశ్ లక్ష్యంగా మొక్కలు నాటి వాటిని సంరక్షించాల్సిన బాధ్యత అందరిపై ఉందని పిలుపునిచ్చారు.