కార్పోరేట్ పన్ను ఎగవేతపై డిప్యూటీ సీఎం పవన్ కల్యాణ్ సీరియస్

ఆంధ్రప్రదేశ్ డిప్యూటీ ముఖ్యమంత్రి పవన్ కల్యాణ్ కార్పోరేట్ పన్ను ఎగవేతపై తీవ్రంగా స్పందించారు. పెద్ద పరిశ్రమలు, విద్యా సంస్థలు పన్నులు చెల్లించడం లేదని, సామాన్య ఉద్యోగులపై మాత్రం భారం పడుతోందని ఆయన అన్నారు.

13,326 గ్రామ పంచాయతీల్లో ఫిల్టర్ బెడ్‌లు, మురుగునీటి శుద్ధి వ్యవస్థల మరమ్మతులకు సుమారు రూ.88 కోట్లు అవసరం. అయితే పరిశ్రమల నుంచి అండర్ అసెస్‌మెంట్ కింద రూ.115.57 కోట్లు, విద్యా సంస్థల నుంచి రూ.45 కోట్లు బకాయి ఉన్నట్లు పవన్ కల్యాణ్ వెల్లడించారు. కేవలం వీటి నుంచే సరైన అంచనా వేస్తే రూ.160-170 కోట్లు వస్తాయని, ఇందులో సగం మొత్తం ఫిల్టర్ బెడ్ మరమ్మతులకు సరిపోతుందని చెప్పారు.

పంచాయతీల నుంచి సరైన రీతిలో పన్ను వసూలు చేస్తే మొత్తం రూ.5,496 కోట్ల ఆదాయం వచ్చే అవకాశం ఉందని పవన్ కల్యాణ్ అంచనా వేశారు. ఈ మొత్తం పారిశుద్ధ్యం, ఫిల్టర్ బెడ్‌లు, ఉద్యోగుల జీతభత్యాల పెంపు, వీధి దీపాలు వంటి వాటికి ఉపయోగపడుతుందన్నారు.

పెద్ద పరిశ్రమలు, విద్యా సంస్థల నిర్వాహకులు పన్నులు చెల్లించకపోవడం దురదృష్టకరమని, వీరిపై కఠిన చర్యలు తీసుకోవాలని ఉన్నతాధికారులను ఆదేశించారు. ఎన్డీఏలో ఉన్న రాజకీయ నాయకులైనా సరే బాధ్యత వహించాల్సిందేనని స్పష్టం చేశారు. పన్ను ఎగవేతదారుల జాబితాను బహిరంగం చేయాలని, 3-4 రోజుల పాటు ప్రత్యేక డ్రైవ్ నిర్వహించాలని ప్రిన్సిపల్ సెక్రటరీకి సూచించారు.

ఈ విషయంపై ముఖ్యమంత్రి చంద్రబాబు నాయుడు దృష్టికి తీసుకెళ్లి, క్యాబినెట్‌లో చర్చించి నిర్ణయం తీసుకుంటామని పవన్ కల్యాణ్ తెలిపారు.