జనసేన ఎమ్మెల్యేలకు పవన్ కళ్యాణ్ హెచ్చరిక: అరవ శ్రీధర్ విప్ పదవికి రాజీనామా

జనసేన పార్టీ ఎమ్మెల్యేలిద్దరిని పవన్ కళ్యాణ్ అమరావతికి పిలిపించి హెచ్చరించారు. పార్టీకి, ప్రభుత్వానికి చెడ్డ పేరు తెస్తే సహించేది లేదని స్పష్టం చేశారు.

తిరుపతి జిల్లా రైల్వే కోడూరు ఎమ్మెల్యే అరవ శ్రీధర్‌పై ఒక మహిళ ఫిర్యాదు చేశారు. తనను మోసం చేశారని మహిళ వీడియోలు విడుదల చేసి పోలీసులకు ఫిర్యాదు చేశారు. కేసు నమోదైంది. దర్యాప్తులో అనుమానాలు రాకుండా ఉండేందుకు శ్రీధర్ ప్రభుత్వ విప్ పదవికి రాజీనామా చేశారు. వ్యక్తిగత కారణాల వల్లే రాజీనామా చేస్తున్నట్లు రాజీనామా లేఖలో పేర్కొన్నారు.

పోలవరం ఎమ్మెల్యే చిర్రి బాలరాజు కూడా పవన్ కళ్యాణ్‌ను కలిశారు. బాలరాజుకు కుటుంబ సభ్యులతో విభేదాలు ఉన్నాయని తెలుస్తోంది. వాటిని పరిష్కరించుకునేందుకు నాలుగు వారాల సమయం కోరారు. పోలవరం నియోజకవర్గంలో పంచాయతీరాజ్ శాఖ తరపున ₹147 కోట్ల విలువైన పనులకు ఆశించినంత పురోగతి లేదని పవన్ ప్రశ్నించారు. అధికారులతో సమన్వయం చేసుకుని పనులు త్వరగా పూర్తి చేస్తానని బాలరాజు హామీ ఇచ్చారు.

ప్రజా ప్రతినిధుల వ్యక్తిగత ప్రవర్తనను ప్రజలు గమనిస్తారని పవన్ గతంలోనే పార్టీ నేతలను హెచ్చరించారు. ఆ హెచ్చరికను పట్టించుకోలేదని పార్టీ వర్గాల్లో అభిప్రాయం ఉంది. మరికొందరు నేతలను కూడా పిలిచి మాట్లాడనున్నట్లు తెలుస్తోంది.