కోడి కూత స్థానంలో నెమలి కేక: శ్రీ సత్యసాయి జిల్లాలో ప్రత్యేక ఆకర్షణ

శ్రీ సత్యసాయి జిల్లా బత్తలపల్లి మండలం ఓబులాపురం గ్రామంలో ప్రతిరోజూ తెల్లవారుజామున కోడి కూతకు బదులు నెమలి కేకతో ప్రజలు నిద్రలేస్తున్నారు. ఈ నెమలి గ్రామంలోని బండి సేనా ఇంట్లో కోళ్లతో కలిసి పెరిగింది.

రెండేళ్ల క్రితం బండి సేనాకు అడవిలో మూడు నెమలి గుడ్లు దొరికాయి. వాటిని ఇంట్లో ఉన్న కోడిగుడ్లతో పాటు పొదిగించగా మూడు నెమలి పిల్లలు బయటికొచ్చాయి. ఏడాది తర్వాత రెండు నెమలి పిల్లలు అడవిలోకి ఎగిరిపోగా, ఒకటి మాత్రం కోడి పిల్లలతోనే పెరిగి పెద్దదైంది.

ఈ నెమలి రాత్రంతా ఇంటి మిద్దెపై పడుకుని, అందరికంటే ముందే లేచి గట్టిగా అరుస్తుంది. గ్రామంలోని ఇతర ఇళ్లకు తిరుగుతూ వారు పెట్టే గింజలు తింటూ ఆత్మీయ నేస్తంగా మారింది. దీంతో ఈ నెమలి గ్రామస్థులకు ఉదయపు ప్రత్యేక అతిథిగా మారింది.