గుంటూరులో ఇన్నర్ రింగ్ రోడ్‌కు 4వ దశను ప్రారంభించిన కేంద్ర మంత్రి పెమ్మసాని

కేంద్ర మంత్రి పెమ్మసాని చంద్రశేఖర్ శనివారం గుంటూరు నగరంలో ఇన్నర్ రింగ్ రోడ్ నాలుగో దశను ప్రారంభించారు. చల్లావారిపాలెం నుంచి జాతీయ రహదారి 16ను అనుసంధానించే ఈ రహదారి పనులు రూ.3 కోట్ల CRDA నిధులతో గత ఆరు నెలల్లో పూర్తయ్యాయని ఆయన తెలిపారు.

ఈ సందర్భంగా మంత్రి మాట్లాడుతూ, గతంలో ఈ రోడ్డు ఎన్నో ఏళ్లుగా దారుణమైన గుంతలతో ఉండేదని, ప్రజలు తీవ్ర ఇబ్బందులు పడ్డారని గుర్తుచేశారు. YSRCP ప్రభుత్వ హయాంలో రాష్ట్రంలో రహదారులకు కనీస మరమ్మతులు కూడా జరగలేదని ఆయన విమర్శించారు.

ప్రస్తుత ప్రభుత్వం రోడ్లు, మౌలిక వసతుల అభివృద్ధికి ప్రాధాన్యత ఇస్తోందని పెమ్మసాని చంద్రశేఖర్ పేర్కొన్నారు. అమరావతి రాజధాని ప్రాంతంలో, గుంటూరు చుట్టు పలు అభివృద్ధి పనులు వేగంగా జరుగుతున్నాయని, అనేక కంపెనీలు ఈ ప్రాంతానికి వస్తున్నాయని ఆయన వివరించారు. ఈ నేపథ్యంలోనే ఇన్నర్ రింగ్ రోడ్డు అనుసంధానం మెరుగైన కనెక్టివిటీ ఇస్తుందన్నారు.

చల్లావారిపాలెం నుంచి నేషనల్ హైవే వరకు మరో అనుసంధాన రహదారి రూ.3 కోట్లతో నాలుగు నెలల్లో పూర్తి చేస్తామని మంత్రి ప్రకటించారు. దీని ద్వారా ఈ ప్రాంత ప్రజలకు జాతీయ రహదారికి త్వరితగతిన చేరుకునే అవకాశం లభిస్తుందని తెలిపారు.