పెన్గంగ నది ఉధృతంగా ప్రవహిస్తుండడంతో పంట పొలాలు మునిగిపోయాయి

మహారాష్ట్రలో కురుస్తున్న భారీ వర్షాల కారణంగా పెన్గంగ నదిలో భారీగా వరద నీరు చేరుతోంది. తెలంగాణ-మహారాష్ట్ర సరిహద్దు ప్రాంతమైన ఆదిలాబాద్ జిల్లాలోని డొలారా గ్రామం వద్ద నది ప్రమాదకర స్థాయిలో ప్రవహిస్తోంది.

లక్షల క్యూసెక్కుల ఇన్ఫ్లో వస్తుండడంతో నదీ తీరంలోని పంట పొలాలు, ఆలయాలు నీట మునిగిపోయాయి. మహారాష్ట్ర వైపు పిప్పల్కోటి గ్రామంలో పత్తి, సోయాబీన్ పంటలు పూర్తిగా నీటిలో మునిగిపోయాయి. నది ప్రవాహంలో చెట్లు, పశువుల కళేబరాలు కొట్టుకు వస్తున్నాయి.

ఎగువన ఉన్న అప్పర్ పెన్గంగ ప్రాజెక్టు గేట్లు తెరిచిన కారణంగా దిగువ ప్రాంతాలకు మరింత వరద ముప్పు ఏర్పడింది. బేలా, జైనత్, తామసి, భీంపూర్ మండలాల వారికి అలర్ట్ జారీ చేశారు. ఆదిలాబాద్‌లో 15 సెంటీమీటర్ల వర్షపాతం నమోదు కావడంతో స్థానికంగా వాగులు, వంకలు పొంగుతున్నాయి.

ప్రజలు అప్రమత్తంగా ఉండాలని అధికారులు హెచ్చరించారు. పోలీసులు పహారా నిర్వహిస్తున్నారు. ప్రమాదాలు జరగకుండా రెండు రోజుల పాటు నదీ పరివాహక ప్రాంతాలకు వెళ్లొద్దని ఆదేశాలు జారీ చేశారు. ఉమ్మడి ఆదిలాబాద్ జిల్లాలో ప్రాణహిత, గోదావరి, వైన్‌గంగ, వరదా నదులు కూడా భారీ వర్షాలతో ప్రమాదకర స్థాయిలో ప్రవహిస్తున్నాయి.