కొత్తపూడి రైతుల నిరసనకు పేర్ని నాని మద్దతు — పూర్తి పరిహారం ఇవ్వాలని డిమాండ్

కృష్ణా జిల్లా మచిలీపట్నం సమీపంలోని కొత్తపూడి గ్రామ రైతులు విద్యుత్ టవర్ల ఏర్పాటుకు వ్యతిరేకంగా నిరసనకు దిగారు. పోర్టు అవసరాల నిమిత్తం విద్యుత్ టవర్లు వేస్తామని రెవెన్యూ అధికారులు రైతులకు ముందస్తు సమాచారం ఇవ్వకుండా మార్కింగ్ చేసినట్లు రైతులు చెప్తున్నారు.

మాజీ మంత్రి పేర్ని నాని ఈ నిరసనకు మద్దతు తెలిపారు. రైతుల అనుమతి లేకుండా మార్కింగ్ జరిగిందని, హై వోల్టేజ్ లైన్లు వేస్తే ఆ భూమికి విలువ పోతుందని ఆందోళన వ్యక్తం చేశారు. విద్యుత్ టవర్లు వేయాలంటే పొలాలన్నింటినీ పూర్తిగా కొనుగోలు చేసి నష్టపరిహారం ఇవ్వాలని పేర్ని నాని డిమాండ్ చేశారు.

ఈ భూమిని 1994–95లో ప్రభుత్వం దళిత కుటుంబాలకు తలాతలా అరఎకరం చొప్పున పట్టాలుగా ఇచ్చింది. తర్వాత మునుపటి ప్రభుత్వ హయాంలో ఆ పట్టాలను ప్రైవేట్ ఆస్తులుగా మార్చారు. ఇప్పుడు ఆ భూమిపై టవర్లు వేస్తే తాకట్టు పెట్టడం గానీ, అమ్మడం గానీ సాధ్యం కాదని రైతులు ఆందోళన వ్యక్తం చేస్తున్నారు.

ఈ విషయంపై విద్యుత్ శాఖ, పోర్టు అధికారుల స్పందన తెలియాల్సి ఉంది.