పీలేరులో హత్య కేసు: CCTV ఫుటేజీలో భార్య అనుమానాస్పదంగా మూటతో బయటకు రావడం, భార్య, కొడుకును అదుపులోకి తీసుకున్న పోలీసులు

అన్నమయ్య జిల్లా పీలేరు నియోజకవర్గంలోని కంకర ఫ్యాక్టరీ లేఔవుట్ సమీపంలో హైవేపై ఎం. సుబ్రహ్మణ్యం (47) అనే వ్యక్తి మృతదేహం కనుగొన్నారు. ప్రాథమికంగా ప్రమాదంగా అనుమానించిన పోలీసులు, శరీరంపై రక్తపు మరకలు, ఘటనాస్థలంలోని పరిస్థితులు చూసి హత్యగా నిర్ధారించారు.

CCTV ఫుటేజీని పరిశీలించగా, సుబ్రహ్మణ్యం ఇంట్లో గొడవ జరిగిన కొద్దిసేపటికే ఆయన భార్య ఉమాదేవి ఒక పెద్ద మూటతో బయటకు రావడం కనిపించింది. దీంతో పోలీసులు ఉమాదేవి, ఆమె కుమారుడు రోహిత్‌లను అదుపులోకి తీసుకుని విచారిస్తున్నారు. మృతుని తండ్రి కృష్ణయ్య పోలీసులకు ఇచ్చిన ఫిర్యాదులో, సుబ్రహ్మణ్యం, ఉమాదేవి మధ్య కొంతకాలంగా తీవ్ర గొడవలు ఉన్నాయని, ఆమెపై అనుమానమే హత్యకు కారణమని ఆరోపించారు.

పీలేరు DSP ఎం.ఆర్. కృష్ణమోహన్ స్పందిస్తూ, తండ్రి ఫిర్యాదు మేరకు కేసు నమోదు చేశామని, కుటుంబ కలహాలు, అక్రమ సంబంధం వంటి అన్ని కోణాల్లో నిష్పక్షపాతంగా దర్యాప్తు జరుగుతోందని తెలిపారు. నిందితులను త్వరలో మీడియా ఎదుట ప్రవేశపెట్టి, హత్యకు సంబంధించిన పూర్తి వివరాలు వెల్లడిస్తామని పేర్కొన్నారు.