పిఠాపురం ఇంచార్జ్ పదవి కోల్పోయిన వర్మ: జనసేన అసంతృప్తి

TDP అధిష్టానం పిఠాపురం నియోజకవర్గ ఇంచార్జ్ పదవి నుంచి మాజీ ఎమ్మెల్యే సత్యనారాయణ వర్మను తొలగించింది. ఆ నియోజకవర్గ పార్టీ కార్యక్రమాల కోసం కమిటీ ఏర్పాటు చేస్తామని TDP ప్రకటించింది.

పదవి కోల్పోయిన తర్వాత వర్మ కాకినాడ నుంచి పని చేస్తున్నారు. పిఠాపురం నియోజకవర్గంలోని 54 గ్రామాలు, రెండు మున్సిపాలిటీలకు చెందిన నేతలు, కార్యకర్తలు కాకినాడకు వచ్చి వర్మను కలుస్తున్నారు. ఒక్కో రోజు ఒక్కో గ్రామం నుంచి వారు రావాలని వర్మ సన్నిహితులు కార్యకర్తలకు చెబుతున్నారు.

వర్మ ప్రతి ఏటా పిఠాపురంలో పుట్టినరోజు వేడుకలు నిర్వహించేవారు. ఈ సారి మాత్రం ఆయన దైవదర్శనం చేసుకుని పిఠాపురం నుంచి వెళ్లిపోయారు. అయినా ఆయన అనుచరులు ఆ వేడుకలు మండలాల వారీగా నిర్వహించారు.

పార్టీ లైన్‌కు అనుగుణంగా పని చేస్తున్నానని, తనను నమ్ముకున్న కార్యకర్తలూ ముఖ్యమే అని వర్మ చెబుతున్నారు. ఇంటికి వచ్చిన వారిని పొమ్మని చెప్పలేనని అంటున్నారు.

వర్మ చర్యలపై జనసేన అసంతృప్తిగా ఉన్నట్లు తెలుస్తోంది. ఇంచార్జ్ పదవి పోయినా ఆయన ఉద్దేశపూర్వకంగా హడావుడి చేస్తున్నారని జనసేన అంటోంది. దీనికి వర్మ స్పందిస్తూ పార్టీ పనులు లేవు కాబట్టి వచ్చిన వారిని కలుస్తున్నానని చెప్పారు. ఈ విషయంపై TDP అధిష్టానం స్పందన తెలియాల్సి ఉంది.