ప్రధాని మోదీ 12 ఏళ్ల పాలనపై కేంద్ర మంత్రి పీయూష్ గోయల్ ప్రశంసలు

ప్రధాని నరేంద్ర మోదీ నాయకత్వంలో భారతదేశం నిరంతరం అభివృద్ధి చెందుతోందని కేంద్ర వాణిజ్య, పరిశ్రమల మంత్రి పీయూష్ గోయల్ అన్నారు. ప్రధానిగా మోదీ 12 ఏళ్లు పూర్తి చేసుకున్న సందర్భంగా ఆయన ఈ వ్యాఖ్యలు చేశారు. మోదీ నాయకత్వంలో దేశంలో వేగంగా మౌలిక సదుపాయాల కల్పన జరుగుతోందని, అంతర్జాతీయంగా భారత్ ప్రతిష్ట పెరిగిందని ఆయన వివరించారు. ప్రపంచంలో అత్యున్నత స్థాయి నేతగా మోదీని చూస్తున్నారని గోయల్ అభిప్రాయపడ్డారు. దేశంలో ఎన్నికైన ప్రధానిగా సుదీర్ఘకాలం పనిచేసిన ఘనత మోదీకే దక్కిందని, 55 ఏళ్లుగా ఆయన అవినీతి రహిత జీవితం గడిపారని గోయల్ కొనియాడారు. సమాజ సేవ, రాజకీయాలు, ప్రభుత్వంలో ఆయన ప్రస్థానం స్ఫూర్తిదాయకమన్నారు. 2047 నాటికి భారతదేశాన్ని అభివృద్ధి చెందిన దేశంగా మార్చాలన్న 'వికసిత్ భారత్' లక్ష్యాన్ని ప్రధాని మోదీ నేతృత్వంలోనే సాధిస్తామన్న నమ్మకాన్ని గోయల్ వ్యక్తం చేశారు. ప్రజలందరికీ ఉజ్వల భవిష్యత్తు ఇచ్చే దిశగా ప్రభుత్వం కట్టుబడి ఉందని ఆయన స్పష్టం చేశారు.