ప్రొఫెసర్ జయశంకర్ వ్యవసాయ విశ్వవిద్యాలయం 62వ వార్షికోత్సవం, హరిత విప్లవంపై సదస్సు

ప్రొఫెసర్ జయశంకర్ తెలంగాణ వ్యవసాయ విశ్వవిద్యాలయం (పీజేటీఎస్‌ఏయూ) 62వ ఆవిర్భావ దినోత్సవం శుక్రవారం రాజేంద్రనగర్‌లోని విశ్వవిద్యాలయ ఆడిటోరియంలో జరిగింది.

ఈ సందర్భంగా ‘భారత హరిత విప్లవంలో ఇందిరా గాంధీ సేవలు’ అనే అంశంపై జాతీయ సదస్సు నిర్వహించారు. తెలంగాణ వ్యవసాయ శాఖ మంత్రి తుమ్మల నాగేశ్వరరావు మాట్లాడుతూ, 62 ఏండ్లుగా ఈ విశ్వవిద్యాలయం అసమాన సేవలు అందిస్తోందని చెప్పారు. మాజీ ప్రధానులు ఇందిరా గాంధీ, లాల్‌బహదూర్ శాస్త్రి చేతుల మీదుగా ప్రారంభమైన ఈ సంస్థ సుమారు 520 పంట రకాలను రూపొందించిందని, అవి రైతుల ఆమోదం పొందాయని తెలిపారు. ఇందిరా గాంధీ శాస్త్రవేత్త ఎంఎస్ స్వామినాథన్ సహకారంతో చేపట్టిన హరిత విప్లవం వల్ల దేశం ఆహార లోటు నుంచి ఎగుమతి స్థాయికి ఎదిగిందని ఆయన పేర్కొన్నారు.

సుప్రీంకోర్టు మాజీ న్యాయమూర్తి జస్టిస్ బి. సుదర్శన్ రెడ్డి వ్యవసాయ రంగ సవాళ్ల పరిష్కారానికి యూనివర్సిటీ మరింత కృషి చేయాలని సూచించారు. ఐఎస్ఐ బెంగళూరు ప్రొఫెసర్ మధురా స్వామినాథన్ దేశం ఆహారోత్పత్తిలో స్వయం సమృద్ధి సాధించిందని, ఇతర దేశాలకు తోడ్పాటు అందించాలని అభిప్రాయపడ్డారు.

వేడుకల్లో డా. వైఎస్ఆర్-కేవీపీ ఫౌండేషన్ తరపున ఉండవల్లి అరుణ్‌కుమార్ విశ్వవిద్యాలయ వైస్‌ఛాన్సలర్ అల్దాస్ జానయ్యకు రూ.21 లక్షల చెక్కును అందజేశారు. ఈ ఎండోమెంట్ వడ్డీతో ఏటా 13 కాలేజీల నుంచి అత్యుత్తమ విద్యార్థికి రూ.లక్ష నగదు, సర్టిఫికెట్ ప్రదానం చేస్తారని వీసీ తెలిపారు. ఈ కార్యక్రమంలో ఉత్తమ రైతులు, సిబ్బంది, శాస్త్రవేత్తలను పురస్కారాలతో సత్కరించారు.