గుంటూరులో 8 కూడళ్ల ఆధునీకరణకు ప్రణాళికలు సిద్ధం

గుంటూరు నగరపాలక సంస్థ నగరంలోని 8 ప్రధాన కూడళ్లను ఆధునీకరించేందుకు ప్రణాళికలు సిద్ధం చేసింది. నగర సుందరీకరణ, ట్రాఫిక్ సమస్యల నివారణ ప్రధాన లక్ష్యంగా ఈ పనులు చేపట్టనున్నారు.

ఎంపిక చేసిన 8 కూడళ్లలో బీఆర్ స్టేడియం, ఎన్ఏఏ సెంటర్, జిన్నా టవర్, పీవీకే నాయుడు కూరగాయల మార్కెట్, హిందూ కాలేజీ, జిల్లా కలెక్టరేట్, మెడికల్ కాలేజీ ట్రిబు, చుట్టుగుంటలు ఉన్నాయి. ప్రతి కూడలి ఆయా ప్రాంత సంస్కృతి, చరిత్రను ప్రతిబింబించేలా డిజైన్లు రూపొందించారు. బీఆర్ స్టేడియం వద్ద ఒలంపిక్ జ్యోతి, క్రీడాకారుల విగ్రహం, కలెక్టరేట్ ఎదుట నాలుగు సింహాల విగ్రహం, మెడికల్ కాలేజీ ట్రిబు వద్ద అశోక ధర్మచక్రం, చుట్టుగుంట కూడలి వద్ద టవర్ క్లాక్ ఏర్పాటు చేయనున్నారు. జిన్నా టవర్ చుట్టూ రోడ్డు వెడల్పు చేసి ఐలాండ్ నిర్మిస్తారు. పీవీకే మార్కెట్ జంక్షన్‌లో ఉన్న విగ్రహానికి ఇబ్బంది లేకుండా ఐలాండ్ ఏర్పాటు చేస్తారు.

ప్రతి కూడలిలో పచ్చదనం, డిజిటల్ సిగ్నలింగ్, లైటింగ్ ఏర్పాటు చేయనున్నారు. వాహనాల ప్రమాదాలు, గందరగోళం నివారించేలా ట్రాఫిక్ విధానం రూపొందించారు. ఏపీ అర్బన్ ఇన్ఫ్రాస్ట్రక్చర్ అండ్ అసెట్ మేనేజ్‌మెంట్ లిమిటెడ్ ఈ డిజైన్‌లను తయారు చేయగా, ఇటీవల జరిగిన సమావేశంలో వాటిని ఖరారు చేశారు. త్వరలో టెండర్లు పిలిచి పనులు ప్రారంభించనున్నారు.

ఈ నేపథ్యంలో ముఖ్యమంత్రి చంద్రబాబు నాయుడు సిఆర్డిఏ సమీక్ష సమావేశంలో గుంటూరు-విజయవాడ నగరాల అభివృద్ధిపై దృష్టి సారించాలని సూచించడం గమనార్హం. మొదటి దశలో 8 కూడళ్ల అభివృద్ధి పూర్తి చేయనున్నారు. ప్రజల స్పందన ఆధారంగా రెండో దశలో మరిన్ని కూడళ్లను అభివృద్ధి చేస్తామని నగరపాలక సంస్థ అధికారులు తెలిపారు.