హైదరాబాద్‌లో నాలాల్లో ప్లాస్టిక్ వ్యర్థాలు; డ్రైనేజీలు బ్లాక్, వరద ప్రమాదం

హైదరాబాద్, తెలంగాణలోని పలు నగరాల్లో నాలాలు, డ్రైనేజీల్లో ప్లాస్టిక్ వ్యర్థాలు గుట్టలుగా పేరుకుపోతున్నాయి. ప్రజలు నేరుగా ప్లాస్టిక్ కవర్లు, బాటిళ్లు, టీ గ్లాసులు వంటివి విసిరేయడంతో సమస్య తీవ్రమౌతోంది.

ఈ చెత్త వల్ల నీరు సరిగా ప్రవహించక, వర్షాకాలంలో రోడ్లు జలమయం అవుతున్నాయి. మురుగునీరు రోడ్లపైకి పారుతుండడంతో దోమలు, ఈగలు పెరిగి సీజనల్ వ్యాధులు వ్యాపిస్తున్నాయని నివాసులు ఆందోళన వ్యక్తం చేస్తున్నారు. ఇటీవల కరీంనగర్‌లో 50 మీటర్ల మేర డ్రైనేజీని క్లీన్ చేయగా రెండు ట్రాక్టర్ ట్రక్కుల ప్లాస్టిక్ వ్యర్థాలు బయటపడ్డాయి.

రాష్ట్రంలో 122 మున్సిపాలిటీలు, 12 గ్రేటర్ కార్పొరేషన్లలో మొత్తం 30 వేల మందికి పైగా పారిశుద్య సిబ్బంది ఉన్నారు. ప్రభుత్వ నిబంధనల ప్రకారం ప్రతీ రెండు నెలలకు ఒకసారి నాలాలు క్లీన్ చేయాలి. ఫిర్యాదు వస్తే 48 గంటల్లోపు సమస్య పరిష్కరించాలని మున్సిపల్ సిటిజన్ చార్ట్ చెబుతోంది.

అయితే, సిబ్బంది రోడ్లు ఊడవడం, చెత్త సేకరణకే పరిమితం అవుతున్నారని, నాలాలు క్లీన్ చేయడం లేదనే విమర్శలు ఉన్నాయి. డ్రైనేజీల శుభ్రత కోసం ప్రభుత్వం ట్రాక్టర్లు, వాక్యూమ్ వాహనాలు, రోడ్ స్వీపింగ్ మిషన్లు, జేసీబీలు వంటి ఆధునిక యంత్రాలను అందుబాటులో ఉంచింది. హైదరాబాద్‌లో ఏటా రూ.400 కోట్లు, ఇతర కార్పొరేషన్లలో రూ.15-25 కోట్ల వరకు పారిశుద్య నిర్వహణకు ఖర్చు చేస్తున్నారు.

రాష్ట్రంలో మొత్తం 25,000 కిలోమీటర్లకు పైగా డ్రైనేజీ నెట్‌వర్క్ ఉంది. 65% పైగా శాశ్వత కాలువలు, 20% భూగర్భ పైప్‌లైన్లు ఉన్నాయి. ఇన్ని సౌకర్యాలు ఉన్నా, సిబ్బంది సమన్వయం లోపం వల్ల ప్రజలు ఇబ్బందులు పడుతున్నారు. రానున్న వర్షాకాలంలో మరిన్ని ప్రాంతాలు నీట మునిగే ప్రమాదం ఉంది. నాలాల శుభ్రతపై ప్రభుత్వం దృష్టి పెట్టాలని పౌరులు డిమాండ్ చేస్తున్నారు.