యుద్ధం ముగించాలన్న మోదీ పిలుపుకు UNలో మద్దతు: శాంతి ప్రయత్నాలకు జైశంకర్ స్పష్టత

ఐక్యరాజ్య సమితి వేదికగా భారత విదేశాంగ మంత్రి ఎస్. జైశంకర్ గల్ఫ్, ఉక్రెయిన్ సంక్షోభాలపై తీవ్ర ఆందోళన వ్యక్తం చేశారు. యుద్ధాలను ముగించాలన్న ప్రధాని నరేంద్ర మోదీ పిలుపును ప్రస్తావిస్తూ శాంతి ప్రయత్నాలకు భారత్ మద్దతు ఇస్తోందని స్పష్టం చేశారు.

గల్ఫ్ ప్రాంతంలో కొనసాగుతున్న ఘర్షణలు ఇప్పటికే క్లిష్టంగా ఉన్న పరిస్థితిని మరింత తీవ్రతరం చేస్తున్నాయని ఆయన అన్నారు. అంతర్జాతీయ జలమార్గాల్లో వాణిజ్య నౌకలు, నావికులను లక్ష్యంగా చేసుకోవడం ఆమోదయోగ్యం కాదని హెచ్చరించారు. అన్ని పక్షాలు సంయమనం పాటించాలని, ఉద్రిక్తతలను తగ్గించుకోవాలని, పౌరుల రక్షణ, ఇంధన, వాణిజ్య సరఫరా నిరంతరాయంగా కొనసాగేలా చూడాలని భారత్ పిలుపునిచ్చింది.

ఐదో ఏడాదిలోకి అడుగుపెట్టిన ఉక్రెయిన్ సంఘర్షణ కూడా సమానంగా ఆందోళన కలిగిస్తోందని జైశంకర్ తెలిపారు. 'అంతులేని యుద్ధం ఇక ముగిసి యుద్ధ ముగింపుకు దారి ఇవ్వాలి' అన్న ప్రధాని మోదీ వ్యాఖ్యలను ఆయన గుర్తు చేశారు. శాంతిని తీసుకొచ్చేందుకు జరుగుతున్న ప్రయత్నాలకు భారత్ మద్దతు ఇస్తోందని పునరుద్ఘాటించారు.

అయితే ఈ ప్రయత్నాలు జరుగుతున్న సమయంలోనే నావికుల భద్రత, ఆహార ధాన్యాలు, ఇంధన సరఫరాపై అత్యవసరంగా దృష్టి పెట్టాల్సిన అవసరం ఉందని ఆయన స్పష్టం చేశారు.