ఐఐటి విద్యార్థులకు ప్రధాని మోదీ: 'మీ నిజమైన రేస్ మీతో మీరే'; రీసెర్చ్‌కు లక్ష కోట్ల నిధులు

ఐఐటి స్నాతకోత్సవంలో ప్రధాని నరేంద్ర మోదీ ప్రసంగిస్తూ పరిశోధన రంగంలో దేశం భారీ పెట్టుబడులు పెడుతోందని తెలిపారు. రీసెర్చ్ డెవలప్మెంట్ అండ్ ఇన్నొవేషన్ స్కీమ్, నేషనల్ రీసెర్చ్ ఫౌండేషన్ వంటి సంస్థల ద్వారా పరిశోధనలకు రూ.లక్ష కోట్ల ఫండింగ్ సమకూర్చనున్నట్లు ప్రకటించారు. ప్రతిభావంతులైన యువతకు ప్రధానమంత్రి రీసెర్చ్ ఫెలోషిప్ (PMRF) ద్వారా పరిశోధనలకు అవకాశం కల్పిస్తున్నామన్నారు. భారత ప్రభుత్వం 'వన్ నేషన్ వన్ సబ్‌స్క్రిప్షన్' పథకం కింద ప్రపంచ ప్రఖ్యాత రీసెర్చ్ జర్నల్స్‌ను దేశంలోని చిన్న పట్టణాలకు కూడా అదనపు ఖర్చు లేకుండా అందుబాటులోకి తెస్తున్నామని వివరించారు. అయితే విద్యార్థులు ఒకరితో ఒకరు పోల్చుకోవడం ఒక పెద్ద డిస్ట్రాక్షన్ అని హెచ్చరించిన ప్రధాని, 'సోషల్ మీడియా యుగంలో ఈ తులన చేయడం ఆగదు. కానీ జీవితం ఒక లీడర్ బోర్డ్ కాదు' అని స్పష్టం చేశారు. 'మీ నిజమైన పోటీ ఎవరితోనూ కాదు, మీతో మీరే. ప్రతిరోజూ నిన్నటి కంటే మెరుగ్గా మారడానికి ప్రయత్నించండి' అని సూచించారు. శారీరక, మానసిక ఆరోగ్యంపై దృష్టి పెట్టాలని కూడా విద్యార్థులకు సూచన చేశారు. చివరగా విద్యార్థులు, వారి తల్లిదండ్రులు, ఉపాధ్యాయులు, సహాయక సిబ్బందికి ప్రధాని మోదీ శుభాకాంక్షలు తెలిపారు.