భారత్ విశ్వసనీయ శక్తి, సూపర్ పవర్ అనడం అర్నబ్ డిక్షనరీ ప్రభావం: ప్రధాని మోదీ

భారత్ ప్రపంచంలో ఒక విశ్వసనీయ శక్తిగా (రిలయబుల్ పవర్) ఎదిగిందని ప్రధాని నరేంద్ర మోదీ అన్నారు. రిపబ్లిక్ మీడియా నెట్‌వర్క్ ఎడిటర్-ఇన్-చీఫ్ అర్నబ్ గోస్వామితో జరిగిన ఒక కార్యక్రమంలో ఆయన ఈ వ్యాఖ్యలు చేశారు. చర్చ సందర్భంగా అర్నబ్ భారత్‌ను సూపర్ పవర్‌గా అభివర్ణించగా, ప్రధాని మోదీ సరదాగా స్పందించారు. "అర్నబ్ ఎన్నో డిక్షనరీలు తెరిచి కూర్చున్నారు, అందుకే సూపర్ పవర్ దాకా వెళ్లిపోయారు. కానీ నేను ఖచ్చితంగా చెప్పేదేమిటంటే, భారత్ ఒక విశ్వసనీయ శక్తి" అని ప్రధాని వ్యాఖ్యానించారు. భారత్ వేగంగా అభివృద్ధి చెందుతున్న ఆర్థిక వ్యవస్థ అని, అదే సమయంలో నమ్మదగిన ఆర్థిక వ్యవస్థ కూడా అని ఆయన వివరించారు. ప్రపంచం భారత్‌ను ఒక శక్తిగా గుర్తిస్తోందని, రాబోయే రోజుల్లో దేశం మరింత కీలక పాత్ర పోషించనుందని ఈ సందర్భంగా ప్రధాని మోదీ సూచించారు.