ప్రధాని మోదీ మెమెంటోస్ ఈ-వేలం: నమామి గంగేకు 52 కోట్ల రూపాయల ఆదాయం

ప్రధాని నరేంద్ర మోదీకి దేశ, విదేశీ ప్రముఖుల నుండి లభించే కానుకలు, జ్ఞాపికలను నేషనల్ గ్యాలరీ ఆఫ్ మోడర్న్ ఆర్ట్ (NGMA) ఆధ్వర్యంలో ప్రతి ఏటా బహిరంగ ఈ-వేలం నిర్వహిస్తున్నారు.

ఈ వేలం ద్వారా వచ్చే నిధులను నమామి గంగే ప్రాజెక్టుకు కేటాయిస్తున్నట్లు అధికారులు తెలిపారు. గత ఐదేళ్లలో జరిగిన వేలాల్లో మొత్తం 52 కోట్ల రూపాయలు సమకూరాయి.

ప్రతి సంవత్సరం సెప్టెంబర్ 17 (ప్రధాని పుట్టిన రోజు) నుండి అక్టోబర్ 31 వరకు కేంద్ర సాంస్కృతిక శాఖ ఈ వేలాన్ని నిర్వహిస్తుంది. ఇందులో చిత్రాలు, శిల్పాలు, హస్తకళ వస్తువులు, మతపరమైన విగ్రహాలు, క్రీడా స్మృతి చిహ్నాలు వంటివి ఉంటాయి. ఈ ఏడాది తుల్జా భవాని విగ్రహం, అయోధ్య రామమందిర మెటాలిక్ మోడల్, జమ్మూకశ్మీర్ షాల్, నీరజ్ చోప్రా జావెలిన్, పారాలింపిక్ సామాగ్రి వంటివి ప్రత్యేక ఆకర్షణగా నిలిచాయి.

2021లో మొదటి వేలం ద్వారా 3.10 కోట్లు, 2022లో 3.60 కోట్లు, 2023లో రెండు దఫాలు (15.80 కోట్లు, 14.40 కోట్లు), 2024లో మూడు దఫాలు (11.16 కోట్లు, 2.24 కోట్లు), 2025లో 1.89 కోట్లు వచ్చాయి. మొత్తం ఆదాయం 52 కోట్ల రూపాయలు.

సేకరించిన నిధులను నమామి గంగే ఫ్లాగ్షిప్ పథకానికి పూర్తిగా వినియోగిస్తున్నారు. గంగా నదిలోని కాలుష్యం తగ్గింపు, మురుగునీటి శుద్ధి కేంద్రాల ఏర్పాటు, నదీ తీరాల సుందరీకరణ, జలచరాల సంరక్షణ వంటి కార్యక్రమాలు ఈ పథకం కింద జరుగుతున్నాయి. గుజరాత్ ముఖ్యమంత్రిగా ఉన్నప్పటి నుంచి ఈ సంప్రదాయం కొనసాగుతోందని అధికారులు వెల్లడించారు.