గల్ఫ్ సంక్షోభం: చమురు సరఫరాపై PMO లో ఉన్నత స్థాయి సమీక్ష సమావేశం

గల్ఫ్ సంక్షోభం వల్ల భారతదేశంపై కలిగే ఆర్థిక ప్రభావాన్ని చర్చించేందుకు ప్రధానమంత్రి కార్యాలయం (PMO) ఉన్నత స్థాయి సమీక్ష సమావేశం ఏర్పాటు చేసింది. చమురు, పెట్రోల్, డీజిల్ సరఫరాలో సంభవించే అంతరాయాలు మరియు ధరల పెరుగుదల వల్ల ప్రజల కొనుగోలు శక్తిపై కలిగే ప్రభావాలు ఈ సమావేశంలో ముఖ్యంగా చర్చించబడతాయి.

కేంద్ర ప్రభుత్వం ఇప్పటికే వివిధ మంత్రిత్వ శాఖల కార్యదర్శులతో ఏడు అధికార బృందాలను ఏర్పాటు చేసింది. ఈ బృందాలు పరిణామాలను నిరంతరం సమీక్షించి PMO కి సూచనలు అందిస్తున్నాయి. ఈసారి PMO ఉన్నతాధికారులు నేరుగా ఈ ఏడు బృందాలతో సమావేశమవుతున్నారు.

దేశంలోని అన్ని రాష్ట్రాల పరిస్థితులను సమగ్రంగా సమీక్షించి, ప్రజలకు ఇబ్బంది కలగకుండా చేయాల్సిన చర్యలు, నియంత్రణ వ్యవస్థలకు ఇవ్వాల్సిన సూచనలపై ఒక కార్యప్రణాళిక రూపొందించుకోవడం ఈ సమావేశం లక్ష్యం.