పోడు భూముల వివాదం తీవ్రమైంది.. కొమరంభీం జిల్లాలో ఉద్రిక్తత

కొమరంభీం ఆసిఫాబాద్ జిల్లా కెరిమేరి ఫారెస్ట్ రేంజ్ పరిధిలో పోడు భూముల వద్ద తీవ్రమైన ఉద్రిక్తత నెలకొంది. దేవుడపల్లి బీట్ లోని సూర్తాపూర్ సివారులో ఉన్న 150 హెక్టార్ల భూమిని అటవి శాఖ అధికారులు స్వాధీనం చేసుకున్నారు. ఈ భూములను తాము సాగు చేసుకుంటున్నామని స్థానిక రైతులు స్పష్టం చేశారు.

ఇటీవల జరిగిన ట్రెంచ్ తవ్వకాలను స్థానిక రైతులు అడ్డుకున్నారు. అటవి పోలీస్ అధికారులతో రైతులు తీవ్రంగా వాగ్వాదానికి దిగారు. తమ భూములను వదిలిపెట్టేది లేదని రైతులు గట్టిగా చెప్పారు. తమకు న్యాయం చేయాలని రైతులు ప్రభుత్వాన్ని డిమాండ్ చేస్తున్నారు.

ఈ నేపథ్యంలో అధికారులు 100 మందికి పైగా పోలీసులతో భారీ బందోబస్తు ఏర్పాటు చేశారు. JCB యంత్రాలతో అటవి శాఖ అధికారులు కందకాల తవ్వకం చేపట్టారు. స్థానిక రైతులు తమకు కొద్దిపాటి భూమి మాత్రమే ఉందని, దాన్ని కూడా తీసుకుంటే తమ జీవనాధారం పోతుందని ఆవేదన వ్యక్తం చేశారు. పరిస్థితి మరింత తీవ్రమవుతుందని స్థానికులు ఆందోళన వ్యక్తం చేస్తున్నారు.