పోలవరం ప్రాజెక్ట్ ప్రభావంపై భద్రాచలంలో సర్వేలు; పీపీఏ, తెలంగాణ ప్రభుత్వం భిన్న అంచనాలు

పోలవరం ప్రాజెక్ట్ నిర్మాణం నేపథ్యంలో భద్రాచలం ప్రాంతంపై బ్యాక్‌వాటర్ ప్రభావాన్ని అంచనా వేసేందుకు సర్వేలు జరుగుతున్నాయి.

పోలవరం ప్రాజెక్ట్ అథారిటీ (పీపీఏ) ప్రకారం, బ్యాక్‌వాటర్ వల్ల కిన్నరసాని పరివాహకంలో కేవలం 320 ఎకరాలు మాత్రమే ముంపునకు గురవుతాయి. అయితే తెలంగాణ ప్రభుత్వం దాదాపు 1000 ఎకరాలకు నష్టం జరిగే అవకాశం ఉందని ఆందోళన వ్యక్తం చేస్తోంది.

2022 వరదల సందర్భంగా భద్రాచలం వద్ద, పోలవరం వద్దా గోదావరి ప్రవాహంలో 3 లక్షల క్యూసెక్కుల తేడా స్పష్టమైంది. దీంతో పోలవరం నిర్మాణం పూర్తయితే భద్రాచలం పరిసరాల్లోని చర్ల, దుమ్ముగూడెం, బూర్గంపహాడ్, మణుగూర్ తదితర ప్రాంతాల్లో వరద ముప్పు పెరగొచ్చని స్థానికులు ఆందోళన చెందుతున్నారు.

భద్రాచలం పట్టణానికి రక్షణగా 2002-03లో 80 మీటర్ల ఎత్తుతో కరకట్ట నిర్మించారు. గోదావరి వంతెన ఎటపాక వైపు 4.82 కిలోమీటర్ల కరకట్ట, ఐదు స్లూయిస్ గేట్లు ఉన్నాయి. పీపీఏ చెబుతున్నట్లు ప్రాజెక్ట్ గరిష్ట నీటి నిల్వ 45.72 మీటర్లు. 55 మీటర్ల ఎత్తులో ఉన్న భద్రాచలానికి ఎలాంటి ప్రమాదం లేదని వారు అంటున్నారు. కానీ 2022 వరదలను దృష్టిలో ఉంచుకుంటే పోలవరం నిర్మాణం తర్వాత భద్రాచలానికి ప్రమాదమేనని స్థానికులు వాదిస్తున్నారు.

పోలవరం నిర్మాణంతో కూనవరం వద్ద వరద స్థాయి త్వరగా పెరుగుతుందని, బ్యాక్‌వాటర్ బూర్గంపహాడ్, పాల్వంచ మండలాల వరకు విస్తరించి దాదాపు 900 ఎకరాలు నీటిలో మునిగే అవకాశం ఉందని స్థానికులు ఆందోళన చెందుతున్నారు. పీపీఏ ఈ నష్టాన్ని తక్కువగా అంచనా వేస్తోందని వారి వాదన.

ప్రస్తుతం 41.15 మీటర్లు, 45.72 మీటర్ల నీటి నిల్వ స్థాయిల వల్ల కలిగే నష్టంపై రెండు రోజుల నుంచి సర్వేలు కొనసాగుతున్నాయి. ఈ సర్వే ఫలితాలపై స్పష్టత రావాల్సి ఉంది.