పోలవరంలో పెద్దపులిని పట్టుకునేందుకు 21 హనుమాన్ బృందాలతో ఆపరేషన్

14 పశువులను చంపిన పెద్దపులిని పట్టుకునేందుకు పోలవరం జిల్లాలో అటవీశాఖ అధికారులు పెద్ద ఎత్తున ఆపరేషన్ చేపట్టారు. ఉప ముఖ్యమంత్రి పవన్ కళ్యాణ్ ఆదేశాలతో ‘హనుమాన్’ పేరుతో 21 ప్రత్యేక బృందాలు రంగంలోకి దిగాయి.

దేవిపట్నం మండలం గంగంపాలెం సమీపంలో ఈ పెద్దపులి సంచరిస్తున్నట్లు గుర్తించారు. శాటిలైట్ రేడియో సిగ్నల్స్, విహెచ్ఎఫ్ రేడియో సిగ్నల్స్ సాయంతో పులి కదలికలను నిరంతరం ట్రాక్ చేస్తున్నారు. కర్ణాటక నుంచి ప్రత్యేకంగా విహెచ్ఎఫ్ బృందాలు వచ్చి ఆపరేషన్‌లో పాల్గొంటున్నాయి. డ్రోన్ కెమెరాలతో అటవీ సిబ్బంది పర్యవేక్షణ కొనసాగిస్తున్నారు.

ఈ పులి ఇప్పటికే 14 పశువులను చంపినట్లు రంపచోడవరం డీఎఫ్ఓ రామచంద్రరావు తెలిపారు. గత కొన్ని నెలలుగా ఈ పులిని ట్రాక్ చేస్తున్నా, పోలవరం జిల్లా లోతట్టు అడవీ ప్రాంతాల వల్ల దాన్ని ట్రాంక్విలైజ్ చేయడం సాధ్యం కాలేదన్నారు. ఇప్పుడు హనుమాన్ టీమ్‌లు, ఆధునిక సాంకేతికతతో పులిని పట్టుకునే ప్రయత్నాలు ముమ్మరం చేశారు.

ప్రస్తుతం పులి గంగంపాలెం సమీపంలో ఉన్నట్లు నిర్ధారించామని అధికారులు చెప్పారు. అది గోదావరి నది దాటి మరో వైపుకు వెళ్లకుండా నిరోధించేందుకు ప్రయత్నిస్తున్నారు. త్వరలోనే పట్టుకుని సురక్షితమైన రిజర్వ్ ఫారెస్ట్‌లో విడిచిపెడతామని అటవీశాఖ అధికారులు తెలిపారు.