తాడిపత్రిలో టీడీపీ, వైసీపీ కార్యక్రమాలపై పోలీసు ఆంక్షలు

అనంతపురం జిల్లా తాడిపత్రిలో టీడీపీ, వైసీపీ రెండు పార్టీల కార్యక్రమాలకు పోలీసులు అనుమతి నిరాకరించారు. శాంతిభద్రతల దృష్ట్యా ఈ నిర్ణయం తీసుకున్నామని పోలీసులు తెలిపారు.

డీఎస్సీ నోటిఫికేషన్‌లో అవకతవకలు జరిగాయని ఆరోపిస్తూ వైసీపీ నేతలు ర్యాలీకి పిలుపునిచ్చారు. ఈ కార్యక్రమానికి మాజీ మంత్రి పెద్దిరెడ్డి రామచంద్రారెడ్డి, మాజీ ఎమ్మెల్యే కేతిరెడ్డి పెద్దారెడ్డి హాజరు కానున్నట్లు వైసీపీ నేతలు ప్రకటించారు. మరోవైపు ప్రభుత్వం రెండేళ్లు పూర్తయిన సందర్భంగా ఇంటింటికీ తెలుగుదేశం కార్యక్రమం నిర్వహించేందుకు టీడీపీ నేతలు సిద్ధమయ్యారు. రెండు పార్టీలు అనుమతి కోసం పోలీస్ శాఖకు లేఖలు ఇచ్చాయి.

"రెండు పార్టీలకు కూడా అనుమతి ఇవ్వలేదు. అనుమతి లేకుండా ఎవరూ కార్యక్రమాలు చేపట్టొద్దు. శాంతిభద్రతలకు భంగం కలిగించే పక్షంలో చర్యలు తప్పవు" అని పోలీసులు హెచ్చరించారు. కేతిరెడ్డి పెద్దారెడ్డి నివాసం వద్ద బారికేడ్లు ఏర్పాటు చేసినట్లు చెప్పారు. ప్రజలు, నాయకులు సహకరించాలని పోలీసులు విజ్ఞప్తి చేశారు.

ప్రస్తుతం తాడిపత్రిలో పోలీసు బందోబస్తు ఏర్పాటు చేశారు. ఇరు పార్టీల నుంచి ఇంతవరకు ఎటువంటి ప్రతిస్పందన రాలేదు.