తుని చిన్నారి జ్ఞానేశ్వరి మిస్సింగ్: పెంపుడు కుక్కకు GPS ట్రాకర్ అమర్చిన పోలీసులు

జ్ఞానేశ్వరి అనే రెండున్నర ఏళ్ల చిన్నారి కాకినాడ జిల్లా తుని మండలంలోని చిక్కుళ్ళ అగ్రహారం గ్రామంలో గత శనివారం మధ్యాహ్నం నుండి కనిపించకుండా పోయింది. ఆమె తల్లిదండ్రులు గణేష్, భవాని వ్యవసాయ కూలీలు. చిన్నారి ఇంటి ముందు పెంపుడు కుక్కతో ఆడుకుంటూ ఉండగా అదృశ్యమైంది.

మంగళవారం మధ్యాహ్నం పెంపుడు కుక్క ఒంటరిగా గ్రామంలోని జీడి తోటల వద్ద కనిపించింది. అది చాలా ఆందోళనగా, ఆకలితో ఉండి పోలీసులపై దాడి చేసింది. చిన్నారి తల్లిని చూడగానే ఆమె వస్త్రాన్ని నోటితో పట్టుకొని గుట్టల వైపు లాగింది. తల్లి 'నా బిడ్డ అక్కడే ఉంది' అంటూ కన్నీరు పెట్టింది.

పోలీసులు స్థానిక యువకుల సాయంతో కుక్కను పట్టుకొని దానికి GPS ట్రాకర్ అమర్చారు. కుక్క గత ఐదు రోజులుగా తిరిగిన ప్రాంతాలను గుర్తించేందుకు డాగ్ స్క్వాడ్ సహాయం తీసుకుంటున్నారు. దట్టమైన అడవులు, కొండ ప్రాంతం కావడంతో గాలింపు కష్టంగా మారింది. అధునాతన డ్రోన్లు కూడా వినియోగిస్తున్నారు.

చిన్నారి ఆచూకి అందించేవారికి పోలీసులు రూ. లక్ష నగదు బహుమతి ప్రకటించారు. సమాచారం ఇచ్చేవారి వివరాలు గోప్యంగా ఉంచుతామని హామీ ఇచ్చారు. చిన్నారిని బిస్కెట్లు, చాక్లెట్లు ఆశ చూపి కిడ్నాప్ చేశారా అనే కోణంలో దర్యాప్తు కొనసాగుతోంది. ఘటనపై ముఖ్యమంత్రి కార్యాలయం సైతం దృష్టి పెట్టింది.