హైదరాబాద్ ORR పై కాల్పులు: దొంగను పట్టుకునే క్రమంలో పోలీసులు కాల్పులు జరిపారు

హైదరాబాద్ లోని ఔటర్ రింగ్ రోడ్డు (ORR) పై అర్ధరాత్రి కాల్పుల కలకలం చోటుచేసుకుంది. నల్గొండ జిల్లా CCS పోలీసులు నాలుగు రోజులుగా ఒక మోస్ట్ వాంటెడ్ నిందితుడి కోసం గాలిస్తున్నారు. ఆదిభట్ల వద్ద బొంగళూరు గేట్ సమీపంలో నిందితుడు లారీలో దాక్కున్నట్లు సమాచారం అందడంతో పోలీసులు అక్కడికి చేరుకున్నారు.

పోలీసులు అతన్ని పట్టుకునేందుకు ప్రయత్నించిన సమయంలో నిందితుడు దాడికి యత్నించాడు. దీంతో పోలీసులు అతని కాళ్ళపై కాల్పులు జరిపారు. గాయపడిన నిందితుడిని అనంతరం వనస్థలిపురం ఏరియా ఆసుపత్రికి తరలించారు.

ఈ ఘటన అర్ధరాత్రి సుమారు 1:00 గంట ప్రాంతంలో జరిగినట్లు తెలుస్తుంది. నిందితుడిపై ఆంధ్రప్రదేశ్ మరియు తెలంగాణ రాష్ట్రాలలో పలు కేసులు నమోదై ఉన్నాయని పోలీసులు గుర్తించారు. ఈ ఘటనకు సంబంధించిన పూర్తి వివరాలు సేకరిస్తున్నారు.