తిరుపతిలో రాజకీయ వేడి: కూటమి విజయోత్సవ సభ vs వైసీపీ నిరసన ర్యాలీ

ఆంధ్రప్రదేశ్ లోని టెంపుల్ సిటీ తిరుపతిలో రాజకీయ వాతావరణం తీవ్ర రూపుదాల్చింది. అధికార NDA కూటమి ప్రభుత్వం రెండేళ్ల పాలన పూర్తి చేసుకున్న సందర్భంగా నేడు విజయోత్సవ సభ నిర్వహిస్తోంది. సంక్షేమం మరియు సుపరిపాలన అనే థీమ్ తో దామినేడు వద్ద 14 ఎకరాల విస్తీర్ణంలో సుమారు 20,000 మంది హాజరయ్యే భారీ బహిరంగ సభ ఏర్పాటు చేశారు. ఈ సభకు డిప్యూటీ CM పవన్ కళ్యాణ్, AP BJP అధ్యక్షుడు PVN మాధవ్ తో పాటు NDA కూటమి ముఖ్య నేతలు హాజరు కానున్నారు. ప్రభుత్వం రెండేళ్లలో అమలు చేసిన అభివృద్ధి మరియు సంక్షేమ కార్యక్రమాలను ప్రజలకు వివరించే కార్యక్రమం ఉంటుందని తెలుస్తోంది.

మరోవైపు కూటమి సభకు కౌంటర్ గా వైసీపీ వెన్నుపోటుకు రెండేళ్లు పేరిట భారీ నిరసన ర్యాలీకి పిలుపునిచ్చింది. తిరుపతిలోని గ్రూప్ సినిమా హాల్ సర్కిల్ నుండి YSR విగ్రహం వరకు ప్రతిపక్షం ర్యాలీ నిర్వహించనుంది. ఈ ర్యాలీలో భూమన కరుణాకర్ రెడ్డి, అభినయ రెడ్డి సహా వైసీపీ ముఖ్య నేతలు పాల్గొంటారు. YS జగన్ పిలుపు మేరకు రాష్ట్రవ్యాప్తంగా అన్ని నియోజకవర్గ కేంద్రాల్లో నిరసన కార్యక్రమాలు చేపట్టాలని పార్టీ శ్రేణులకు ఆదేశాలు జారీ అయ్యాయి. ఈ నెల నాలుగో తేదీ నుండి వివిధ రూపాల్లో నిరసన కార్యక్రమాలు చేస్తూ వస్తున్న వైసీపీ, మండల కేంద్రాల్లో సదస్సులు నిర్వహిస్తూ ప్రభుత్వ వైఫల్యాలను ప్రజల్లోకి తీసుకువెళుతోంది. DSC నియామకాల అంశంపై కూడా ర్యాలీల్లో ప్లకార్డులు ప్రదర్శిస్తున్నారు.

సభ మరియు ర్యాలీ నేపథ్యంలో SP సుబ్బారాయుడు ఆధ్వర్యంలో 1,000 మంది పోలీసులతో కట్టుదిట్టమైన బందోబస్తు ఏర్పాటు చేశారు. తిరుపతి మొత్తం రాజకీయంగా వేడెక్కిన వాతావరణంలో ఉంది.