శాయంపేటలో 608 మందికి డబుల్ బెడ్రూమ్ ఇళ్ల పంపిణీ

హన్మకొండ జిల్లా శాయంపేటలో మంత్రి పొంగులేటి శ్రీనివాసరెడ్డి 608 మంది లబ్ధిదారులకు డబుల్ బెడ్రూమ్ ఇళ్లను పంపిణీ చేశారు.

ఈ కార్యక్రమంలో ఎమ్మెల్యే నాయిని రాజేందర్రెడ్డి, కాంగ్రెస్ నాయకురాలు కడియం కావ్య పాల్గొన్నారు.

రాష్ట్ర ప్రభుత్వం ప్రస్తుతం 2.5 లక్షల ఇందిరమ్మ ఇళ్లను నిర్మిస్తోందని, రాబోయే రోజుల్లో మరో లక్ష ఇళ్లు అందిస్తామని మంత్రి తెలిపారు. మొదటి విడతలో 4.5 లక్షల ఇళ్ల కోసం రూ.22,500 కోట్లు కేటాయించగా, ఒక్కో ఇంటికి రూ.5 లక్షలు నాలుగు విడతల్లో ఉచితంగా ఇవ్వనున్నారు. ప్రతి నియోజకవర్గానికి కనీసం 3,500 ఇళ్లు నిర్మించాలని లక్ష్యంగా పెట్టుకున్నట్లు ఆయన వివరించారు.

గత ప్రభుత్వం పూర్తి చేయకుండా వదిలేసిన ఇళ్లను ప్రస్తుతం పూర్తి చేసి అర్హులైన వారికి అందజేస్తున్నట్లు మంత్రి పేర్కొన్నారు. శాయంపేటలో గతంలో ఎస్సీలకు కేటాయించిన భూమిపై నిర్మించిన ఇళ్లలో 42 మంది ఎస్సీ కుటుంబాలకు, పక్క వీధులకు చెందిన మరో 17 మందికి ఇళ్లు కేటాయించినట్లు చెప్పారు. వరంగల్ వెస్ట్ నియోజకవర్గంలో క్యాన్సర్ బాధితుల కుటుంబాలకు రెండు ఇళ్లు తాను సిఫారసు చేయగా, వాటిని మంజూరు చేసినట్లు ఆయన వెల్లడించారు.