కేంద్ర పథకాలకు మ్యాచింగ్ గ్రాంట్స్ ఇస్తున్నాం: మంత్రి పొన్నం ప్రభాకర్

కేంద్ర ప్రభుత్వ పథకాలకు రాష్ట్ర ప్రభుత్వం మ్యాచింగ్ గ్రాంట్స్ ఇస్తోందని మంత్రి పొన్నం ప్రభాకర్ తెలిపారు. కేంద్రం నుంచి వచ్చే నిధులను సమర్థంగా వినియోగించి ప్రజా సమస్యలు పరిష్కరిస్తామని ఆయన చెప్పారు.

పెండింగ్‌లో ఉన్న సాగునీటి ప్రాజెక్టులను పూర్తి చేస్తామని మంత్రి ప్రకటించారు. కరీంనగర్‌లో పట్టణీకరణ పెరుగుతున్న నేపథ్యంలో ఈ మధ్యనే దాదాపు 1,000 పోస్టులను అర్బన్ డెవలప్‌మెంట్ విభాగంలో భర్తీ చేయడానికి క్యాబినెట్ ఆమోదం తెలిపిందని ఆయన పేర్కొన్నారు.

కరీంనగర్‌లో చాలా కాలంగా పెండింగ్‌లో ఉన్న డబుల్ బెడ్‌రూమ్ ఇళ్లను పేదలకు వెంటనే ఇవ్వాలని ఇన్‌చార్జి మంత్రి తుమ్మల నాగేశ్వరరావు కోరారు. రాజకీయాలు, ఇతర పరిగణనలు లేకుండా ఇళ్లు అందజేయాలని ఆయన సూచించారని పొన్నం ప్రభాకర్ తెలిపారు.

రాష్ట్ర, కేంద్ర ప్రభుత్వాల నుంచి వీలైనన్ని నిధులు తీసుకురావడానికి ప్రయత్నాలు జరుగుతున్నాయని మంత్రి చెప్పారు. జిల్లా అభివృద్ధి కోసం విలేకరుల సూచనలను ఆహ్వానించారు. జిల్లా విద్యార్థులు, యువకులు భవిష్యత్తులో ముందుండేలా కృషి చేస్తామని ఆయన అన్నారు.