రాత్రిపూట సూర్యకాంతి అమ్మే ప్రయోగం: అంతరిక్షంలో అద్దాలు పంపనున్న Reflect Orbital

అమెరికాలోని కాలిఫోర్నియాకు చెందిన స్టార్టప్ సంస్థ Reflect Orbital రాత్రిపూట సూర్యకాంతిని అందించే ప్రయోగానికి సిద్ధమవుతోంది. అంతరిక్షంలో పెద్ద అద్దాలను పంపి, వాటి ద్వారా సూర్యకాంతిని భూమిపైకి పరావర్తనం చేయాలని కంపెనీ ప్లాన్ చేస్తోంది.

ఈ ప్రయోగం కోసం కంపెనీ భారత రాకెట్ స్టార్టప్ సంస్థ Skyroot Aerospace తో ఒప్పందం కుదుర్చుకుంది. రెండు రాకెట్ ప్రయోగాల ద్వారా ఈ అద్దాల పనితీరును పరీక్షించనున్నారు. ఈ కాంతిని కస్టమర్లు సబ్‌స్క్రిప్షన్ రూపంలో కొనుగోలు చేసుకోవచ్చని కంపెనీ చెప్తోంది.

రాత్రిపూట సోలార్ ప్యానెల్స్ పనిచేయవని, దాంతో విద్యుత్ ఉత్పత్తి ఆగిపోతుందని కంపెనీ చెప్తోంది. అంతరిక్షం నుంచి కాంతిని పంపితే రాత్రి కూడా సోలార్ విద్యుత్ ఉత్పత్తి చేసుకోవచ్చని కంపెనీ పేర్కొంటోంది. వరదలు, ప్రమాదాల సమయంలో రెస్క్యూ బృందాలకు వెలుతురు అందించడానికి కూడా ఇది ఉపయోగపడుతుందని కంపెనీ వివరిస్తోంది.

అయితే ఈ ప్రయోగంపై శాస్త్రవేత్తలు అనుమానాలు వ్యక్తం చేస్తున్నారు. భూమి చుట్టూ ఉన్న వాతావరణంలో ధూళి కణాలు, తేమ ఉంటాయి. అంతరిక్షం నుంచి వచ్చే శక్తివంతమైన కాంతి ఈ వాతావరణంలోకి రాగానే చెదిరిపోతుందని వారు చెప్తున్నారు. దాంతో కాంతి ఒకరి ఇంటికే పరిమితం కాకుండా పక్క ఇళ్లకు కూడా చేరుతుందని శాస్త్రవేత్తలు హెచ్చరిస్తున్నారు. కంపెనీ మాత్రం తమ కాంతి వెన్నెలలా సున్నితంగా ఉంటుందని, కొనుగోలు చేసిన వారి ప్రాంతంలోనే కేంద్రీకృతమవుతుందని చెప్తోంది.

రాత్రిపూట టెలిస్కోపులతో నక్షత్రాలు, పాలపుంతను పరిశీలించే ఖగోళ శాస్త్రవేత్తలకు ఈ అద్దాలు అడ్డుగా మారుతాయని ఆందోళన ఉంది. పగలు, రాత్రి అనే సహజ లయను ఈ కృత్రిమ కాంతి దెబ్బతీస్తుందని పర్యావరణ వేత్తలు హెచ్చరిస్తున్నారు. పక్షులు, జంతువులు, చెట్లు, మనుషుల జీవ గడియారం ప్రభావితమవుతుందని, నిద్రలేమి సమస్యలు పెరుగుతాయని వారు చెప్తున్నారు.

పగటిపూట సూర్యకాంతి అందరికీ ఉచితంగానే లభిస్తుంది. దాన్ని రాత్రిపూట వ్యాపార సరుకుగా మార్చడం సరైందా అనే చర్చ కూడా జరుగుతోంది. రెండు టెస్ట్ లాంచ్‌ల ఫలితాలపైనే రాత్రి సూర్యకాంతి సేవలు అందుబాటులోకి రావడం ఆధారపడి ఉంది.