మిడ్జిల్ మండలంలోని పలు ప్రాథమిక పాఠశాలల్లో మౌలిక సదుపాయాల కొరత

మహబూబ్ నగర్ జిల్లా మిడ్జిల్ మండలంలోని పలు ప్రాథమిక పాఠశాలల్లో మౌలిక సదుపాయాలు తీవ్రంగా లోపించాయి. వస్తుల గ్రామంలో PM శ్రీ పాఠశాలగా ఎంపికైన ప్రాథమిక పాఠశాలలో సైన్స్ ల్యాబ్ భవన నిర్మాణం రెండేళ్ల క్రితం మంజూరైన నిధులతో పాటు పిల్లర్ల దశలోనే నిలిచిపోయింది.

తరగతి గదుల కొరతతో విద్యార్థులు చెట్ల కింద, వరండాల్లో కూర్చొని పాఠాలు వినాల్సి వస్తోంది. రాణీపేట ప్రాథమిక పాఠశాలలో ఐదు తరగతులకు కేవలం రెండు గదులు మాత్రమే ఉన్నాయని ప్రధానోపాధ్యాయుడు మోహన్ తెలిపారు. 30 మంది విద్యార్థులు, ఇద్దరు ఉపాధ్యాయులతో తమకు చాలా ఇబ్బందిగా ఉందని ఆయన చెప్పారు.

పాఠశాల ప్రహరీ పడిపోవడంతో కుక్కలు, పాములు వచ్చే పరిస్థితి నెలకొంది. దీంతో రహదారి పక్కనే ఉన్న పాఠశాలకు పిల్లలను పంపేందుకు తల్లిదండ్రులు భయపడుతున్నారు. గత విద్యా సంవత్సరంలో సమస్యలను ప్రజావాణి ద్వారా కలెక్టర్‌కు నివేదించినా ఇప్పటివరకు స్పందన లేదని చెప్పారు. బాత్‌రూమ్‌లు శిథిలం కావడం, వంట గదిలో రేకులు పడిపోవడంతో మధ్యాహ్న భోజనం బయటే చేయించాల్సి వస్తోందని వారు వివరించారు.

ఈ విషయంపై ఆయా పాఠశాలల మండల విద్యాధికారి (MEO) స్పందిస్తూ, తాము ఇటీవలే బాధ్యతలు స్వీకరించామని, సమస్యలను ఉన్నతాధికారుల దృష్టికి త్వరలో తీసుకెళ్తామని తెలిపారు. అలాగే ప్రభుత్వం తగిన చర్యలు తీసుకుంటుందని ఆశాభావం వ్యక్తం చేశారు.

మిడ్జిల్ మండలం ముఖ్యమంత్రి రేవంత్ రెడ్డి రాజకీయ ప్రస్థానం ప్రారంభమైన ప్రాంతం. ఈ ప్రాంతంలోని పాఠశాలల మౌలిక సదుపాయాల లోపాలకు పరిష్కారం కోసం విద్యాశాఖ చర్యలు తీసుకోవాలని స్థానికులు కోరుతున్నారు.