కాకినాడ జిల్లాలో యువతి అనుమానాస్పద మృతి; ఇంటి యజమాని కుమారుడు అదుపులో

కాకినాడ రూరల్ ప్రాంతంలోని స్వామి నగర్‌లో ప్రమిల అనే యువతి అనుమానాస్పద స్థితిలో మృతి చెందింది. ఆమె ఓ ప్రైవేట్ ఆసుపత్రిలో నర్సుగా పనిచేస్తుండగా, స్నేహితులు విధులకు వెళ్లిన సమయంలో ఇంట్లో ఉరివేసుకుని ఉన్నట్లు గుర్తించారు.

మృతురాలి కుటుంబ సభ్యులు, బంధువులు ఈ మృతిపై అనుమానం వ్యక్తం చేస్తూ, తమ అమ్మాయిని హత్య చేశారని ఆరోపిస్తున్నారు. ఇంటి యజమాని కుమారుడు భరత్ నందన్‌తో ప్రమిలకు ప్రేమ వ్యవహారం ఉందని, అతడు పెళ్లి చేసుకుంటానని నమ్మించి, తర్వాత నిరాకరించడంతో మానసికంగా ఒత్తిడికి గురైందని కుటుంబీకులు చెబుతున్నారు. తమ దగ్గర ఇద్దరి వీడియోలు ఉన్నాయని, భరత్ నందన్‌ను పోలీసులు అదుపులోకి తీసుకోవాలని వారు డిమాండ్ చేశారు.

బంధువుల ఫిర్యాదు మేరకు కాకినాడ పోలీసులు భరత్ నందన్‌ను అదుపులోకి తీసుకుని దర్యాప్తు ప్రారంభించారు. మృతదేహాన్ని పోస్టుమార్టం నిమిత్తం ఆసుపత్రికి తరలించారు. కేసు నమోదు చేసుకున్న పోలీసులు, అనుమానాస్పద మృతిపై విచారణ జరుపుతున్నట్లు తెలిపారు. ఈ ఘటనపై స్థానికంగా కలకలం రేగింది.