15 ఏళ్ల కెరీర్ అనుభవాలు పంచుకున్న నటి ప్రీతి శ్రీనివాస్

ప్రముఖ సీరియల్ నటి ప్రీతి శ్రీనివాస్ తన 15 ఏళ్ల కెరీర్ అనుభవాలను ఇటీవల ఓ ఇంటర్వ్యూలో పంచుకున్నారు. ఆమె కన్నడ ఇండస్ట్రీలో 18 ఏళ్ల వయసులో నటనా ప్రస్థానం మొదలుపెట్టారు. తెలుగులో ‘కౌశికి’ సీరియల్‌తో గుర్తింపు పొందారు.

ప్రీతి శ్రీనివాస్ మాట్లాడుతూ, “15 ఏళ్ల ప్రయాణంలో ఎన్నో ఒడిదొడుకులు ఎదురైనా, నేను ప్రయాణాన్నే ఆస్వాదిస్తాను. నా తండ్రి ఇచ్చిన విలువలు నాకు ఆత్మవిశ్వాసాన్ని ఇచ్చాయి. స్వావలంబనతో ముందుకు సాగాలన్నదే నా లక్ష్యం” అన్నారు.

ఆమె చదువు విషయంలోనూ అదే పట్టుదల కనబరచారు. సైకాలజీలో మాస్టర్స్ డిగ్రీ, హ్యూమన్ రిసోర్సెస్‌లో ఎంబీఏ పూర్తి చేశారు. షూటింగ్ షెడ్యూల్స్ మధ్య పరీక్షలు రాయడం కష్టంగా ఉండేదని, అటెండెన్స్ తక్కువ ఉన్నందున ఒకసారి హాల్ టికెట్ ఇవ్వకుండా బయట నిలబెట్టారని గుర్తు చేసుకున్నారు. ఫ్రెండ్స్ సలహా మేరకు స్టాఫ్ రూమ్‌లో అడిగి హాల్ టికెట్ తీసుకుని, పరీక్ష రాసి పాసయ్యారు.

చివరగా కన్నడ భాషలో అభిమానులకు శుభాకాంక్షలు తెలిపారు.