సుప్రీం కోర్టు న్యాయమూర్తుల సంఖ్య 34 నుండి 38కు పెంపు — రాష్ట్రపతి ఆర్డినెన్స్ జారీ

రాష్ట్రపతి ద్రౌపది ముర్ము సుప్రీం కోర్టు న్యాయమూర్తుల సంఖ్యను 34 నుండి 38కు పెంచుతూ ఆర్డినెన్స్ జారీ చేశారు. ఆర్డినెన్స్ జారీతో ఈ నిర్ణయం వెంటనే అమల్లోకి వచ్చింది.

ప్రధాని నరేంద్ర మోదీ అధ్యక్షతన జరిగిన కేంద్ర మంత్రివర్గ సమావేశం ఈ ప్రతిపాదనకు ముందే ఆమోదం తెలిపింది. వచ్చే పార్లమెంట్ సమావేశాల్లో దీనికి అనుగుణంగా బిల్లు ప్రవేశపెడతారని కేంద్ర మంత్రి అశ్విని వైష్ణవ్ తెలిపారు.

ప్రస్తుతం సుప్రీం కోర్టులో సుమారు 92,000 కేసులు పెండింగ్‌లో ఉన్నాయి. ప్రజలకు వేగంగా న్యాయం అందించాలన్న ఉద్దేశంతో ఈ నిర్ణయం తీసుకున్నట్లు కేంద్రం తెలిపింది. అదనపు న్యాయమూర్తుల వల్ల కలిగే ఖర్చును భారత సంఘటిత నిధి నుండి సమకూరుస్తారు.

ప్రస్తుతం సుప్రీం కోర్టులో CJI తో కలిపి 32 మంది న్యాయమూర్తులు పని చేస్తున్నారు. మరో రెండు పోస్టులు ఖాళీగా ఉన్నాయి. ఈ సంవత్సరం నవంబర్ లోపు నలుగురు న్యాయమూర్తులు పదవి విరమణ చేయనున్నారు.