మహబూబాబాద్‌లోని ప్రైవేట్ పాఠశాలలో విద్యార్థులు బోనాల వేడుకలు నిర్వహించారు

మహబూబాబాద్‌లోని ఓ ప్రైవేట్ పాఠశాలలో బోనాల వేడుకలు నిర్వహించారు. విద్యార్థులు సాంప్రదాయ పద్ధతిలో బోనం కుండలను అలంకరించి ఊరేగింపుగా ఆలయానికి తీసుకెళ్లారు.

బోనం కుండలకు పసుపు, కుంకుమ, వేపాకుల అలంకరణ చేశారు. విద్యార్థులు మేళతాళాల నడుమ సాంప్రదాయ నృత్యాలు చేశారు. అమ్మవారి, పోతురాజు వేషాలతో సహచరులను అలరించారు.

విద్యార్థులు ముత్యాలమ్మ తల్లి ఆలయానికి చేరుకుని బోనాలు సమర్పించారు. అక్కడ మొక్కులు చెల్లించుకున్నారు. పాఠశాల ప్రిన్సిపాల్ బోనాల చరిత్రను విద్యార్థులకు వివరించారు.

పాఠశాల ప్రిన్సిపాల్ తెలిపిన వివరాల ప్రకారం 1813లో ప్లేగు వ్యాధి వల్ల చాలా మంది మరణించారు. ప్రజలు మహంకాళి అమ్మవారికి భోజనాలు సమర్పించిన తర్వాత వ్యాధి తగ్గింది. భోజనాలు అనే పదం నుంచే బోనాలు అనే పేరు వచ్చింది. ఆషాఢ మాసంలో గోల్కొండలో మొదటి బోనం సమర్పిస్తారు. ఆ తర్వాత మహంకాళి అమ్మవారికి, లష్కర్ బోనాలు సమర్పిస్తారు. 2014లో బోనాలను తెలంగాణ రాష్ట్ర పండుగగా ప్రకటించారు.