రాజమహేంద్రవరంలో ప్రియాంక ప్రమాదం: తండ్రి ఫిర్యాదు, కఠిన శిక్షలకు డిమాండ్

వైద్య విద్యార్థిని ప్రియాంక ప్రమాద ఘటనలో ఆమె తండ్రి వెంకటేష్ పోలీసులకు ఫిర్యాదు చేశారు. రాజమహేంద్రవరం ప్రకాష్ నగర్ పోలీస్ స్టేషన్‌లో ఆయన ఈ ఫిర్యాదు అందజేశారు.

ఈ నెల 3న రాత్రి మద్యం మత్తులో కారు నడుపుతూ, ఇద్దరు వైద్య విద్యార్థులను ఢీకొట్టారని ఫిర్యాదులో పేర్కొన్నారు. ప్రియాంక ప్రస్తుతం తీవ్ర గాయాలతో హైదరాబాద్ కిమ్స్ ఆసుపత్రిలో వెంటిలేటర్ పై చికిత్స పొందుతోంది. ఆమె అపస్మారక స్థితిలో ఉన్నారు.

పోలీసులు ఇప్పటికే నిందితులను అరెస్ట్ చేసి, రాజమహేంద్రవరం సెంట్రల్ జైలుకు తరలించారు. నిందితులు సురావరపు దశవంత్ ఆండ్రూ జోసెఫ్ అడగ్రోజ్ పై కఠిన చర్యలు తీసుకోవాలని వెంకటేష్ కోరారు. ప్రస్తుతం నమోదైన సెక్షన్లు తక్కువ తీవ్రతతో ఉన్నాయని, కఠిన శిక్ష పడేలా సెక్షన్లు మార్చాలని డిమాండ్ చేశారు.

వెంకటేష్ మాట్లాడుతూ, నిందితులు మూడు సార్లు కారుతో స్కూటీని ఢీకొట్టారని, ఇది ప్రమాదం కాకుండా ఉద్దేశపూర్వకమైన హత్యా ప్రయత్నంగా కనిపిస్తోందని చెప్పారు. ఈ ఘటనపై ప్రభుత్వం ఇప్పటివరకు స్పందించలేదని, ఆసుపత్రి ఖర్చులకు సహాయం అందించాలని ఆయన విజ్ఞప్తి చేశారు.

పోలీసులు దర్యాప్తు కొనసాగిస్తున్నట్టు తెలిపారు. ప్రియాంక ఆరోగ్య పరిస్థితిని బట్టి అదనపు సెక్షన్లను జోడించే అంశం పరిశీలనలో ఉంది.